ផ្ទុះឆេះរថយន្តស្ទូចមួយគ្រឿង ក្នុងរោងចក្រអគ្គិសនី

ចែករំលែក៖

ភ្នំពេញ ៖ ហេតុការណ៍ភ្ញាក់ផ្អេីលមួយបន្ទាប់ពីរថយន្តស្ទូចមួយគ្រឿងបានផ្ទុះឆាបឆេះដោយមិនដឹងមូលហេតុ ហើយបានរាលដាលដល់ឃ្លាំងស្តុកនៃរោងចក្រអគ្គិសនីមួយកន្លែងឆេះបំផ្លាញសម្ភារៈខាងក្នុងមួយចំនួន និងបណ្តាលឲ្យបុគ្គលិកម្នាក់រងរបួសត្រូវបញ្ជូនទៅសង្គ្រោះនៅមន្ទីរពេទ្យភ្លាមៗ។

ហេតុការណ៍នេះកើតឡើងនៅវេលាម៉ោង ១១និង០០នាទីព្រឹក ថ្ងៃទី២៦ ខែវិច្ឆិកា ឆ្នាំ២០១៩ នៅចំណុចរោងចក្រអគ្គិសនី ស្ថិតនៅចំណុចភូមិប្រទះឡាង សង្កាត់ប្រទះឡាង ខណ្ឌកំបូល រាជធានីភ្នំពេញ។

ប្រភពព័ត៌មានបានឲ្យដឹងថា មុនពេលកេីតហេតុគេបានលឺសម្លេងផ្ទុះចេញពីក្នុងរថយន្តស្ទូចមួយគ្រឿងដែលចតទុកក្នុងឃ្លាំងខាងលេីភ្លាមនោះទេីបបង្កជាអណ្តាតភ្លេីងឆេះយ៉ាងសន្ធោសន្ធៅបង្កការភ្ញាក់ផ្អេីលដល់កម្មករនាំគ្នាយកបំពង់ពន្លត់អគ្គិភ័យមកបាញ់និងរាយការណ៍ទៅសមត្ថកិច្ចហៅរថយន្តពន្លតអគ្គិភ័យមកអន្តរាគមន៍ភ្លាមៗ។

សមត្ថកិច្ចបានឲ្យដឹងថា អគ្គិភ័យខាងលើបានឆេះបំផ្លាញរថយន្តស្ទូចចំនួន១គ្រឿងទាំងស្រុង ឃ្លាំងស្តុកសម្ភារៈអគ្គិសនី ទំហំ ២០ម៉ែត្រ x ៣០ម៉ែត្រ អស់ប្រហែល៣០% ពុំបានបណ្តាលឲ្យឆេះរាលដាលដល់ផ្ទះអ្នកនៅក្បែរខាងឡើយ និងបណ្តាលឲ្យបុគ្គលិកម្នាក់រងរបួសត្រូវបានបញ្ជូនទៅសង្គ្រោះមន្ទីរពេទ្យភ្លាមៗ។

ក្នុងហេតុការណ៍នេះ មានរថយន្តការិយាល័យពន្លត់អគ្គិភ័យ ចំនួន ៥គ្រឿង រថយន្តកងពលតូចលេខ70ចំនួន ២គ្រឿង, រថយន្តក្រុមហ៊ុនស្រាបៀរកម្ពុជាចំនួន ១គ្រឿង ទើបអាចពន្លត់ភ្លើងបានទាំងស្រុង នៅម៉ោង១៣និង០០នាទីរសៀល នាថ្ងៃខែឆ្នាំដដែល ៕សុខាសែនជ័យ