ភ្នំពេញ៖ បុរសជនជាតិចិនដីគោក បានធ្វើសកម្មភាពលួចលុយនិងទូរស័ព្ទដៃមួយគ្រឿង ដែលជនរងគ្រោះ​ជាជនជាតិខ្មែរទុកនៅក្នុងរថយន្តដោយមិនបានចុចឡុកសោទ្វាររថយន្តបានសម្រេចហើយប្រុងរត់គេចខ្លួន ក៏ត្រូវជនរងគ្រោះឃើញទាន់ស្រែកឆោឡោផ្អើលសមត្ថកិច្ចនគរបាលខណ្ឌមានជ័យកំពុងល្បាតក្បែរនោះជួយធ្វើអន្តរាគមន៍ឃាត់ខ្លួនបានភ្លាមៗ ។

ករណីចាប់ខ្លួនចោរជនជាតិចិនខាងលើនេះ បានធ្វើឡើងកាលពីវេលាម៉ោង១១ព្រឹក ថ្ងៃទី១៦ ខែធ្នូ ឆ្នាំ២០១៩ ត្រង់ចំណុចផ្លូវបេតុង ស្ថិតភូមិទ្រា១ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។

តាមប្រភពព័ត៍មានពីមន្រ្តីនគរបាលខណ្ឌមានជ័យ បានឲ្យដឹងថា កម្លាំងជំនាញបានឃាត់ខ្លួនជនសង្ស័យម្នាក់ ឈ្មោះ វួយ ជីងអ៊ីង (WEIJINYUN) ភេទប្រុស អាយុ ៥៣ ឆ្នាំ ជនជាតិចិនដីគោក គ្មានលិខិតឆ្លងដែន មានទីលំនៅនិងមុខរបរមិនពិតប្រាកដ (ពាក់ព័ន្ធករណីលួច) ។ ចំណែកជនរងគ្រោះឈ្មោះ ទួន ខន ភេទប្រុស អាយុ ៤៥ ឆ្នាំ ជនជាតិខ្មែរ មុខរបរទិញ-លក់អេតចាយ មានទីលំនៅភូមិព្រៃញឹក ឃុំខ្វាវ ស្រុកសំរោង ខេត្តតាកែវ  ។

វត្ថុតាងចាប់យក៖ លុយខ្មែរចំនួន៥០០,០០០រៀល(ហាសិបម៉ឺនរៀល) ជារបស់ជនរងគ្រោះ និង ទូរស័ព្ទដៃ០១​គ្រឿងម៉ាកអូប៉ូពណ៍ក្រហម ជារបស់ជនសង្ស័យ។

បច្ចុប្បន្ន ជនសង្ស័យត្រូវសមត្ថកិច្ចឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី៕ភារ៉ា ដង្កោ