ខេត្តតាកែវ៖ ចោរស្រីជនជាតិវៀតណាមម្នាក់ ប្រើល្បិចធ្វើជាខ្ចីម៉ូតូអ្នកជិតខាង រួចយកទៅចំលងសោ ពេលម្ចាស់មិននៅធ្វើសកម្មភាពគាស់សោទ្វារបន្ទប់យកម៉ូតូជនរងគ្រោះទៅបាត់ដោយសុវត្ថិភាព ប៉ុន្តែគេចខ្លួនបាន២ថ្ងៃត្រូវសមត្ថកិច្ចចាប់ខ្លួន ។

ករណីឃាត់ខ្លួនជនសង្ស័យខាងលើនេះ បានធ្វើឡើងកាលពីវេលាម៉ោង ៧ និង ១០នាទី ថ្ងៃទី៣ ខែមករា  ឆ្នាំ២០២០ សមត្ថកិច្ចឃាត់ខ្លួនជនសង្ស័យម្នាក់ពាក់ព័ន្ធករណីលួច ស្ថិតភូមិត្នោតខាងកើត ឃុំអង្គតាសោម ស្រុកត្រាំកក់ ខេត្តតាកែវ ។

ជនសង្ស័យឈ្មោះ ច្រាំង គីមស៊ីង ភេទស្រី អាយុ ១៧ ឆ្នាំ ជនជាតិវៀតណាម ស្នាក់នៅផ្ទះជួល ស្ថិតភូមិខាង លើ ស្រុកត្រាំកក់ ខេត្តតាកែវ ។ ចំណែកជនរងគ្រោះឈ្មោះ ឆោម សែម ភេទប្រុស អាយុ ៣០ ឆ្នាំ រស់នៅផ្ទះជួលបន្ទាប់ជាប់គ្នា ។

សម្ភារ:បាត់បង់៖ ម៉ូតូម៉ាក សេ១២៥ ស៊េរី២០១៦ ពណ៌ខ្មៅ ពាក់ស្លាកលេខ តាកែវ 1L-8243 ។

តាមប្រភពពីមន្រ្តីនគរបាលស្រុក បានឲ្យដឹងថា មុនពេលកើតហេតុ វេលាម៉ោង ៦ និង ១០នាទី ថ្ងៃទី៣១ ខែធ្នូ ឆ្នាំ២០១៩ ជនសង្ស័យបានខ្ចីម៉ូតូពីជនរងគ្រោះយកទៅចំឡងសោ ហើយក៏យកទៅឲ្យម្ចាស់វិញ បន្ទាប់មក ជនរងគ្រោះចេញទៅលក់នំជាមួយប្រពន្ធ ជនសង្ស័យក៏យកទល់ល្វីសមួលគន្លឹះទ្វារ រួចលួចយកម៉ូតូទៅបាត់  លុះដល់ថ្ងៃទី១ ខែមករា ឆ្នាំ២០២០ ទើបជនរងគ្រោះទៅដាក់ពាក្យបណ្ដឹងនៅអធិការដ្ឋាននគរបាល ។

ក្រោយទទួលបានបណ្ដឹង សមត្ថកិច្ចបានធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យ យកទៅសាកសួរ ដើម្បីកសាងសំណុំរឿងចាត់ការតាមនីតិវិធី៕