ភ្នំពេញ៖ តារាស្រីល្បីឈ្មោះកញ្ញា តន់ ច័ន្ទសីម៉ា បានធ្វើឲ្យអ្នកលេងបណ្តាញសង្គមមានការកោតសរសើរខ្លាំងចំពោះទឹកចិត្តក្រោយពីនាងប្រកាសជួយដល់ស្ត្រីចំណាស់ទុរគតម្នាក់ដែលមានជីវិតិតកម្សត់ខ្លាំងនៅខេត្តសៀមរាបនោះ។
ក្រោយពីបានឃើញ គ្រួសារក្រីក្រខ្សត់ជាស្ត្រីមេម៉ាយ ហើយត្រូវចិញ្ចឹមកូនតូចៗ១០នាក់ រកអង្ករហូបបាយស្ទើរគ្មាន និត្រូវដើរសុំឆ្អឹងត្រី យកទៅដាក់ជាមួយអំបិល ហូបជាមួយបាយ មើលទៅគួរឲ្យសង្វេគ ត្រូវបានចែកចាយលើបណ្ដាញសង្គមFacebook តារាចម្រៀង តារាចម្រៀង តន់ ច័ន្ទសីម៉ា បានប្រកាសបែបនេះថា ខ្លួនសូមជួយឧបត្ថម្ភ អង្ករ ១តោន ត្រីខ ១០យួរ មី ៣០ កេស និងថវិកា ២០ ម៉ឺនរៀល ។ ថវិកា និងគ្រឿងឧបភោគបរិភោគទាំងនេះនាងនិងក្រុមការងារនិងចាត់ចែងយកជូនពួកគាត់ ក្រោយពីទទួលបានលេខទំនាក់ទំនងទៅកាន់ស្ត្រីរូបនេះ។
គួររំលឹកដែរថាតាមគណនីFacebook ឈ្មោះថា Standard Living បានបង្ហោះរឿងរ៉ាវដ៏គួរឲ្យរំជួលចិត្តមួយ បន្ទាប់ពីជួបក្មេងៗគ្រួសារក្រីក្រខ្សត់មួយ មកសុំឆ្អឹងត្រី យកទៅដាក់ជាមួយអំបិល ហូបជាមួយបាយ ឃើញហើយពិតជាសង្វេគមែនទែន។ គណនេយ្យខាងលើបានឲ្យដឹង បែប នេះថា៖ “មិញនឹងខ្ញុំទប់ទឹកភ្នែកមិនបាន ហួសចិត្តពេក គាត់ទៅសុំឆ្អឹងត្រី ដែលមិត្តខ្ញុំបេះយកសាច់ធ្វើទឹកគ្រឿង ហើយសល់ឆ្អឹងនឹងសាច់តិចៗ ស្មានតែគាត់យកទៅណាលោកអើយលោក ខ្ញុំអោយមិត្តទៅមើលហើយក៏ខលទៅ មើលឃើញខ្ញុំក៏អួលដើមក យកទៅនាំកូនហូបបាយ ជា១ឆ្អឹងត្រីនឹងអំបិលម្ទេស ។ ខ្ញុំក៏សម្រេចប្រាប់រឿងរកការជួយដល់គាត់ និយាយ១គាត់ ហើយរំភើបឡើងយំ សូមបងប្អូនជួយគាត់ផង។”
បើតាមគណនីហ្វេសប៊ុកដដែលបានឲ្យដឹងបន្ថែម ស្រ្តីខាងលើជាស្ត្រីមេម៉ាយ ហើយត្រូវចិញ្ចឹមកូនតូចៗ១០នាក់ រកអង្ករហូបបាយស្ទើរគ្មានម្តងៗ រស់នៅ ភូមិខ្នាឃុំក្រទួត ស្រុកស្វាយក្រៅ ខេត្តសៀមរាប។ មានអ្នកលេងបណ្តាញសង្គមហ្វេសប៊ុក ចាប់អារម្មណ៍ស៊ែរចែកចាយដោយក្តុកក្តួលពេលឃើញរូបថតជាច្រើនសន្លឹក នឹងរូបភាពកំសត់របស់គ្រួសារក្រីក្រ មួយដោយក្រសឹងតែគ្មានអ្វីញាំ នឹងសុំឆ្អឹកត្រីសល់ពីគេបោះចោលមកចែកគ្នាញាំ សង្វេកណាស់ ។
ទន្ទឹមនោះតារាចម្រៀងស្រីកំពុងក្រសោបប្រជាប្រិយក្រោយឈានជើងចូលទ្រនំធំ កាឡាក់ស៊ី ណាវ៉ាត្រា របស់ឧកញ៉ាវ័យក្មេងចិត្តសប្បុរស ឡេង ណាវ៉ាត្រា និងត្រូវអ្នកគាំទ្រស្គាល់ច្បាស់ម្ចាស់បទ «គេនោះជាស្រីកាប់ដាវ» តន់ ច័ន្ទសីម៉ា ក៏មិនអាចឃាត់ចិត្តទប់អារម្មណ៍ដ៏សែនស្រណោះចំពោះរូបភាពឥតកាឡៃនេះបាន ចេញសារប្រកាសផ្ដល់នូវទឹកចិត្តខ្លួនតាមរយៈការជូនថវិកា និងគ្រឿងឧបភោគបរិភោគ ជូនដល់ស្ត្រីខាងលើក្រោយពីតារាស្រីរូបនេះបញ្ជាក់ថានាងធ្លាប់ជួបប្រទះនឹងបញ្ហាប្រឈមនឹងជីវិភាពខ្វះខាតខ្លាំងមុនពេលទទួលបានការគាំទ្រច្រើនពីទស្សនិកជនដូចបច្ចុប្បន្ន៕ ដោយ វឌ្ឍនា
