សភាអឺរ៉ុប កាលពីថ្ងៃទី២៩ខែមករា បានបោះឆ្នោតអនុម័តប្រេស៊ីតជាផ្លូវការ ហើយសមាជិកសភា អឺរ៉ុបក៏បាន ជូនដំណើរតំណាងប្រទេសអង់គ្លេស ប្រចាំនៅសភាអឺរ៉ុបផងដែរ។
ក្រោយកិច្ចពិភាក្សាអស់រយៈពេល២ម៉ោង និងកិច្ចពិភាក្សា ជាង៣ឆ្នាំកន្លងមក រវាងសភាអឺរ៉ុប ដែលមានទីតាំងនៅទីក្រុង ប្រ៊ុចសែល ប្រទេសប៊ែលហ្ស៊ិច និង អង់គ្លេស នៅទីបំផុត កិច្ចព្រមព្រៀង ប្រេស៊ីតបានអនុម័តជាផ្លូវការនៅថ្ងៃទី២៩ខែមករា។
នៅក្នុងការបោះឆ្នោតអនុម័ត មានសំឡេងគាំទ្ររហូតដល់ទៅ៦២១ ប្រឆាំង៤៩ អនុបវាទ១៣ សំឡេង សភាអឺរ៉ុបបានសម្រេចជាផ្លូវការឲ្យអង់គ្លេសចាកចេញពីអឺរ៉ុប ចាប់ពីវេលាម៉ោង០៖០០នាទីថ្ងៃទី៣១ ខែមករា ឈានចូលថ្ងៃទី១ខែកុម្ភៈ(ម៉ោងនៅទីក្រុងប្រ៊ុយសែល)។
ប៉ុន្តែដំណើរការចាកចេញនឹងត្រូវអូសន្លាយដល់ថ្ងៃទី៣១ខែធ្នូឆ្នាំ២០២០ ក្នុងរយៈពេលនេះ អង់គ្លេសត្រូវតែគោរពទៅតាមច្បាប់របស់អឺរ៉ុប ប៉ុន្តែមិនមានសំឡេង ឬសិទ្ធិអ្វីនៅក្នុងអឺរ៉ុបទៀតឡើយ។ ចំណែកទំនាក់ទំនងពាណិជ្ជកម្ម រវាង អង់គ្លេសនិងអឺរ៉ុប នឹងត្រូវបន្តពិភាក្សានាពេលខាងមុខទៀត។
នៅក្នុងពិធីចែកផ្លូវគ្នា ជាមួយអង់គ្លេស សមាជិកព្រឹទ្ធសភាអឺរ៉ុប កាន់ដៃគ្នា និយាយពាក្យលាគ្នាដោយក្តីអាឡោះអាល័យបំផុត។ ហើយជោគវាសនានៅក្នុងទំនាក់ទំនងនយោបាយ សេដ្ឋកិច្ច រវាងអង់គ្លេស និងអឺរ៉ុបទៅជាយ៉ាងណានោះឡើយ។
ប្រធានសហគមន៍អឺរ៉ុប លោកស្រី Ursula von der Leyen បានបញ្ជក់ថា លោកស្រីចង់ឲ្យអឺរ៉ុបនិងអង់គ្លេសរក្សាទំនាក់ទំនងជិតស្និទ្ធិនិងគ្នា។ ប៉ុន្តែលោកស្រីបានលើកឡើងពីផលលំបាកនៃកិច្ចពិភាក្សា ដោយអង់គ្លេស មិនមែនជាប្រទេសសមាជិក។
ចំណែកពលរដ្ឋអឺរ៉ុបនិងអង់គ្លេស ក៏ដូចគ្នានេះដែរគឺអាចធ្វើដំណើរចេញចូលតាមធម្មតា រហូតដល់បំណាច់ឆ្នាំ២០២០៕ ដោយ៖ ធីរីណា