ភ្នំពេញ៖ បុរសម្នាក់ ទំនងជាញៀនគ្រឿងដ៏កម្រិតហើយគ្មានប្រាក់ទិញថ្នាំញៀនប្រើប្រាស់ បានលួងលោមកូនស្រីរបស់ខ្លួនឲ្យទៅផ្ទះសំណាក់ ដើម្បីលក់ខ្លួនឲ្យបុរសម្នាក់ទៀតក្នុងតម្លៃ ៣០០ដុល្លារអាមេរិក ភ្លាមនោះកូនស្រីដឹងខ្លួនទាន់ក៏ទូរស័ព្ទប្រាប់បងប្អូនឲ្យប្តឹងសមត្ថកិច្ចជួយធ្វើអន្តរគមន៍ ឃាត់ខ្លួនបុរសជាឪពុកភ្លាមៗនឹងដកហូតបានគ្រឿងញៀនចំនួន៣កញ្ចប់ផងដែរ ។

ហេតុការណ៍ខាងលើនេះ បានកើតឡើងកាលពីវេលាម៉ោង១០និង៣០នាទីយប់ ថ្ងៃទី១ ខែកុម្ភៈ ឆ្នាំ២០២០​ នៅចំណុចមុខសួនច្បារវត្តបុទុមវត្តី ក្នុងសង្កាត់ចតុមុខ ខណ្ឌដូនពេញ ។

ជនសង្ស័យដែលត្រូវជាឪពុកមានឈ្មោះសុខ ឃាង ភេទប្រុស អាយុ៤១ឆ្នាំ ជនជាតិខ្មែរ មុខរបររត់ម៉ូតូឌុប ​មានទីលំនៅផ្ទះជួល សង្កាត់ស្រះចក ខណ្ឌដូនពេញ រាជធានីភ្នំពេញ ។

តាមប្រភពព័ត៍មានពីសាក្សីនៅកន្លែង បានឲ្យដឹងថា មានករណីបុរសម្នាក់ដែលត្រូវជាឪពុកបង្កើត បានលួង​លោមកូនស្រីរបស់ខ្លួនទៅផ្ទះសំណាក់ ដើម្បីលក់ខ្លួនឲ្យបុរសម្នាក់ទៀតក្នុងតម្លៃ ៣០០ដុល្លារ តែត្រូវក្មេងស្រីរងគ្រោះដឹងខ្លួន ហើយបានរត់ចេញ និងបានទូរស័ព្ទប្រាប់ក្រុមគ្រួសារដឹងសាច់រឿងហើយ ទើបប្តឹងសមត្ថកិច្ចជួយធ្វើអន្តរាគមន៍ផងដែរ ។

ប្រភពដដែលបន្តថា ក្រោយពីសមត្ថកិច្ចបានទទួលពាក្យបណ្ដឹងពីក្រុមគ្រួសារជនរងគ្រោះហើយ ក៏បានប្រើល្បិចឲ្យជនរងគ្រោះទូរស័ព្ទណាត់ឪពុកឲ្យមកជួបនៅមុខសួនច្បារវត្តបុទុមវត្តី ពេលជនសង្ស័យមកដល់កម្លាំងជំនាញក៏បានឃាត់ខ្លួនយកមកសួរនាំនៅប៉ុស្តិ៍ចតុមុខ និងឆែកឆេររកឃើញគ្រឿងញៀន​ ចំនួន​៣កញ្ចប់នៅនឹងខ្លួនបុរសខាងលើផងដែរ ។

បច្ចុប្បន្នជនសង្ស័យចំពោះមុខកម្លាំងប៉ុស្តិ៍ ខណ្ឌ កំពុងប្រើវិធានការជំនាញសួរចម្លើយស្រាវជ្រាវរកបក្ខពួកដែលបានប្រព្រឹត្តកន្លងមក ដើម្បីកសាងសំណុំរឿងតាមនិតិវិធី ៕ស រស្មី