មនុស្សនៅជុំវិញពិភពលោក កំពុងតែផ្តោតក្រសែភ្នែកទាំងអស់ទៅលើប្រទេសចិន ជានាគកំណាចមួយនៅលើពិភពលោក ពេលនេះកំពុងតែ«ត្រូវព្រួញពឹស» គឺមេរោគ (កូរ៉ូណា) ធ្វើឲ្យពន្លឺនៃឥទ្ធិពល ដែលបានជះទៅលើពិភពលោក ហាកបីដូចជាស្រអាប់ជាងមុន ។
យ៉ាងណា រដ្ឋាភីបាលទីក្រុងប៉េកាំង ក្រោមការដឹកនាំរបស់ប្រធានាធិបតី ស៊ី ជីងពីន មានជំនឿជឿជាក់ថា នឹងកម្ចាត់«វីរុសកូរ៉ូណា» ក្នុងពេលឆាប់ៗ ដើម្បីបញ្ចេញពន្លឺជាថ្មីនៅលើពិភពលោកវិញ។មនុស្សជាច្រើន យលឃើញថា ការផ្ទុះឡើងនៃជំងឺ ផ្លូវដង្ហើម កំពុងតែផ្តាច់ ដង្ហើមសេដ្ឋកិច្ចរបស់ចិន ។ ប៉ុន្តែ មូលនិធីរូបិយវត្ថុអន្តរជាតិ បានលើកឡើងថា សេដ្ឋកិច្ច ចិន នៅតែរឹងមាំដដែល បើទោះបី ផ្ទុះវីរុសកូរ៉ូណាក្តី ។
ប្រធានមូលនិធិរូបិយវត្ថុអន្ដរជាតិ (IMF) នៅតែមានទំនុកចិត្តថា សេដ្ឋកិច្ចរបស់ចិន នៅតែរឹងមាំ មិនមានអ្វីប៉ះពាល់ធ្ងន់ធ្ងូនោះឡើយ។ លោកស្រី Kristalina Georgieva នាយកគ្រប់គ្រងមូលនិធិរូបិយវត្ថុអន្ដរជាតិ បានថ្លែង កាលពីថ្ងៃទី៣ ខែមករា ថា IMF គាំទ្រដល់កិច្ចខិតខំប្រឹងប្រែងរបស់ចិន ក្នុងការទប់ស្កាត់នូវការរីករាលដាល នៃវីរុសកូរ៉ូណា ហើយ IMF នៅតែមានទំនុកចិត្តថា សេដ្ឋកិច្ចរបស់ប្រទេសចិន នៅតែរឹងមាំ។
ប្រធានរូបិយវត្ថុអន្ដរជាតិ បានសរសេរ នៅក្នុងបណ្ដាញសង្គមថា IMF សូមសម្ដែងនូវការអាណិតអាសូរអស់ពីបេះដូង ចំពោះការខិតខំប្រឹងរបស់ចិន ក្នុងការទប់ស្កាត់នូវការគំរាមកំហែងពីវីរុសកូរ៉ូណា ដែលកំពុងរីករាលដាលយ៉ាងខ្លាំង។ IMF គាំទ្រដល់ការខិតខំប្រឹងប្រែងរបស់ចិន រួមទាំងសកម្មភាពសារពើពន្ធ រូបិយវត្ថុ និងហិរញ្ញវត្ថុ។ IMF មានជំនឿថា ចិននៅតែមានសេដ្ឋកិច្ចខ្លាំងក្លា។
អ្នកនាំពាក្យ IMF លោក Gerry Rice បានថ្លែងនៅក្នុងសន្និសីទខ្លីមួយថា IMF បានបង្ហាញការគាំទ្រដល់ការតស៊ូរបស់ចិន ប្រឆាំងនឹងការរីករាលដាល នៃវីរុសកូរ៉ូណា។ នៅពេលនេះ អាជ្ញាធរចិន កំពុងតែធ្វើការងារដ៏ធ្ងន់ធ្ងរបំផុត។ ប៉ុន្ដែទោះជាយ៉ាងណា ចិននៅតែមានសេដ្ឋកិច្ចខ្លាំងក្លា ដោយសារចិនមានធនធានយ៉ាងច្រើន ហើយអាចប្រឈមមុខនឹងការដោះស្រាយចំពោះការរីករាលដាល នៃវីរុសផ្លូវដង្ហើមថ្មីនេះបាន។
វីរុសកូរ៉ូណា បានផ្ទុះឡើង នៅក្នុងទីក្រុងវូហាន ខេត្តហ៊ូប៉ី ប្រទេសចិន ប៉ុន្ដែបើគិត្រឹមថ្ងៃទី៤ ខែកុម្ភៈ ឆ្នាំ២០២០ ជំងឺផ្លូវដង្ហើមប្រភេទថ្មីនេះ បានសម្លាប់ជនជាតិចិន ៤២៥ ចិនហុងកុងម្នាក់ និងជនជាតិចិន នៅហ្វីលីពិនម្នាក់។
ដោយឡែកមនុស្សជាង២ម៉ឺននាក់ផ្សេងទៀត បានឆ្លងវីរុសកូរ៉ូណា ដោយរាលដាលដល់បណ្ដាប្រទេសជាច្រើន រួមមាន ចិន ហុងកុង ជប៉ុន កូរ៉េខាងត្បូង វៀតណាម ហ្វីលីពីន ថៃ ម៉ាឡេស៊ី កម្ពុជា … ជាដើម។
ស្លាប់ដោយវីរុសកូរ៉ូណាកើនឡើងខ្ពស់ជាងជំងឺ SARS កាលពីឆ្នាំ២០០២-២០០៣ ដោយពេលនោះមានអ្នកស្លាប់តែ ៣៤៩នាក់តែប៉ុណ្ណោះ ។ចំណែកវីរុសកូរ៉ូណា បានសម្លាប់មនុស្សកើនឡើងដល់ទៅ៤២៥នាក់ហើយ។
នៅពេលនេះចិនចំាបាច់ត្រូវតែបញ្ចេញប្រាក់ដ៏ច្រើនសន្ធឹកសន្ធប់ ទ្រទ្រង់សេដ្ឋកិច្ច ឲ្យស្ថិតស្ថេរ នូវនឹង មិនធ្លាក់ចុះដូចការបារម្ភរបស់ពិភពលោក។ ធនាគារកណ្តាលចិនបានប្រកាសបញ្ចេញលុយជាង ១៧១ ០០០លានដុល្លារ។
ប្រតិបត្តិការបញ្ចេញប្រាក់របស់ធនាគារកណ្តាលនឹងចាប់ផ្តើមនៅថ្ងៃចន្ទ ទី៣ កុម្ភៈ ពោលចំថ្ងៃដែលផ្សារមូលប័ត្របើកទ្វារជាថ្មី បន្ទាប់ពីបានឈប់សម្រាកក្នុងពេលបុណ្យចូលឆ្នាំថ្មី និងបានពន្យារពេលបិទទ្វារដោយសារមេរោគកូរ៉ូណាថ្មី។ ធនាគារកណ្តាលចិនបានពន្យល់នៅក្នុងសេចក្តីប្រកាសព័ត៌មានមួយថា អន្តរាគមន៍របស់ខ្លួនមានគោលដៅជួយរក្សាបរិមាណសាច់ប្រាក់សមហេតុផលនៅលើទីផ្សារសម្រាប់ប្រព័ន្ធហិរញ្ញវត្ថុ និងសម្រាប់ស្ថិរភាពទីផ្សារប្តូរប្រាក់។
ជាមួយគ្នានោះដែរធនាគារកណ្តាលចិនក៏បានប្រកាសចេញនូវវិធានការមួយចំនួនដើម្បីទំនុកបម្រុងដល់ក្រុមហ៊ុន សហគ្រាសដែលរួមចំណែកនៅក្នុងយុទ្ធនាការប្រឆាំងនឹងមេរោគកូរ៉ូណាថ្មី។
មេរោគកូរ៉ូណាថ្មីដែលកំពុងមានសន្ទុះកើនឡើងពីមួយថ្ងៃទៅមួយថ្ងៃនៅក្នុងប្រទេសចិនក៏ដូចជានៅប្រទេសមួយចំនួនក្នុងលោក។ តាមក្រុមអ្នកវិភាគ មេរោគផ្លូវដង្ហើមមួយនេះបានធ្វើឲ្យចិនបាត់បង់ទឹកប្រាក់សរុបជាង ១៤០ ០០០លានដុល្លារនៅក្នុងវិស័យសំខាន់ៗជាច្រើន ពិសេសទេសចរណ៍ និងភោជនីយដ្ឋាន។
ចិនដែលកំពុងមានកំណើនសេដ្ឋកិច្ចទាបខ្លាំងគិតក្នុងរយៈពេល ៣០ឆ្នាំចុងក្រោយសង្ឃឹមមានសន្ទុះឡើងវិញ បន្ទាប់ពីមានកិច្ចព្រមព្រៀងជាមួយអាមេរិកកាលពីខែមករាក្នុងជម្លោះសង្រ្គាមពាណិជ្ជកម្ម។ តែក្តីសង្ឃឹមហាក់កំពុងញាំញីដោយមេរោគកូរ៉ូណាថ្មី។ រហូតមកដល់ពេលនេះ ធនាគារកណ្តាលចិនបានបញ្ជាក់ពីផលវិបាកសេដ្ឋកិច្ចមានកម្រិត ៕
