ខេត្ដក្រចេះ៖ ក្មេងស្រីសិស្សសាលា ជំទង់២នាក់បានលង់ទឹកទន្លេស្លាប់នៅ ចំណុចខ្សាច់មាត់ទន្លេ ស្ថិតនៅភូមិទី១ សង្កាត់រកាកណ្ដាល ក្រុង-ខេត្ដក្រចេះ ។
ករណីនេះបង្កឱ្យមានការភ្ញាក់ផ្អើល ដល់អ្នកទៅកម្សាន្ដនៅទីនោះកាលពី រសៀលថ្ងៃទី៧ ខែមករា ឆ្នាំ២០១៦ ។
នគរបាលក្រុងក្រចេះដែលចុះទៅ កាន់កន្លែងកើតហេតុបានឱ្យដឹងថា ក្មេង ស្រីរងគ្រោះដែលលង់ទឹកទន្លេស្លាប់នេះ ទី១-ឈ្មោះ ចេន ទេសរក្សា អាយុ១០ឆ្នាំ និងទី២-ឈ្មោះ មូល លីណា អាយុ១០ឆ្នាំ រស់នៅក្នុងភូមិ-ឃុំកើតហេតុខាងលើ ។
ប្រភពនៅកន្លែងកើតហេតុបានឱ្យដឹងថា មុនពេលកើតហេតុគេបានឃើញ ក្មេងស្រីរងគ្រោះទាំង២នាំគ្នាចុះហែល ទឹកលេងនៅតំបន់ឆ្នេរទន្លេនៃខេត្ដក្រចេះ ហើយទំនងជាពួកគេចុះទៅកន្លែងចំណុច*ទឹកជ្រៅក៏លង់ក្មេងស្រីម្នាក់ ហើយក្មេង ស្រីម្នាក់ទៀតពេលដែលឃើញដូច្នេះ ទៅជួយក៏លង់ស្លាប់ទាំង២តែម្ដង។ ក្រោយពីកើតហេតុឪពុកម្ដាយក្មេងស្រី រងគ្រោះមិនអស់ចិត្ដបានបញ្ជូនក្មេងស្រីទាំង២មកកាន់មន្ទីរពេទ្យ តែត្រូវបាន ក្រុមគ្រួពេទ្យបញ្ជាក់ប្រាប់ថាពួកគេបាន បាត់បង់ជីវិតទៅហើយ ។
នៅក្នុងមន្ទីរពេទ្យគេបានសង្កេតឃើញ អាណាព្យាបាលក្មេងស្រីរងគ្រោះយំទួញ សោកស្ដាយយ៉ាងខ្លាំងចំពោះកូនស្រី ដែលមានវ័យកំពុងពេញស្រលាញ់ ទោះ ជាដឹងថាកូនស្លាប់ហើយក្ដី ពួកគាត់យំ រៀបរាប់ហាក់បីដូចជាកូនកំពុងនៅមាន ជីវិតយ៉ាងដូច្នោះដែរ ។
បើតាមប្រជាពលរដ្ឋរស់នៅភូមិ១ សង្កាត់រកាកណ្ដាល ក្បែរចំណុចឆ្នេរទន្លេ នៃកន្លែងកើតហេតុបាននិយាយថា នេះ មិនមែនជាលើកទី១ទេដែលមានក្មេងៗ លង់ទឹកស្លាប់នៅទីនោះ គឺបានកើតឡើង ច្រើនលើកមកហើយដោយសារតែពួក គេចុះលេងទឹកមិនមានការមើលថែពី មនុស្សចាស់ ។ យ៉ាងណាក៏ដោយចំពោះ ករណីដដែលៗនេះអាជ្ញាធរមូលដ្ឋានគួរ មានការដាក់កម្លាំងសមត្ថកិច្ចយាម ល្បាតនៅតំបន់ឆ្នេរខ្សាច់ទន្លេមួយនេះ ដែលមានប្រជាពលរដ្ឋទៅលេងច្រើន ដើម្បីបញ្ចៀសការគ្រោះថ្នាក់ដល់ជីវិត មនុស្សបន្ដទៀត ៕
ដោយ៖ កោះទ្រុង
