ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានផ្ញើសារតាមរយៈទំព័រហ្វេសប៊ុកនៅថ្ងៃអង្គារនេះទៅកាន់ជនរួមជាតិដោយសរសេរថា អបអរសាទរទិវាវប្ប ធម៌ជាតិ ថ្ងៃ៣មីនា នៅមុនពេលសម្តេចអញ្ជើញជាអធិបតីភាពចូលរួមពិធីជួបជុំអបអរទិវាវប្បធម៌ជាតិថ្ងៃទី០៣មីនា ឆ្នាំ២០២០នេះ ។
សម្តេចតេជោ ហ៊ុន សែន បានផ្ញើសារលើកឡើងថា ចូលរួមអបអរសាទរទិវាវប្បធម៌៌ជាតិ ថ្ងៃ៣មីនា។ ទិវាវប្បធម៌ជាតិ ៣មីនា ជាទិវាដ៏សំខាន់មួយរបស់ប្រទេសជាតិ ដែលជានិច្ចកាល រាជរដ្ឋាភិបាលបានយកចិត្តទុកដាក់ រៀបចំប្រារព្ធជារៀងរាល់ឆ្នាំ ដើម្បីរំលឹកគុណូបការៈ និងស្នាដៃដ៏វិសេសវិសាល របស់បុព្វបុរសនៃយើងដែលបានបន្សល់ទុក នូវមរតកវប្បធម៌ដ៏សម្បូរបែប និងមានតម្លៃមិនអាចកាត់ថ្លៃបាន ដល់កូនចៅជំនាន់ក្រោយ។
សម្តេចតេជោបានសរសេរបញ្ជាក់ថា ការប្រារព្ធវប្បធម៌ជាតិ ជាការជំរុញការផ្សព្វផ្សាយ ការផ្ទេរចំណេះដឹង ចំណេះធ្វើ ជំនាញបច្ចេកទេស និងទេពកោសល្យវប្បធម៌ ក៏ដូចជាក្រើនរំលឹក បំផុសស្មារតីស្រឡាញ់វប្បធម៌ជាតិ និងមនសិការស្នេហាជាតិ ដល់ប្រជាពលរដ្ឋទាំងអស់ ជាពិសេសយុវជនដែលជាទំពាំងស្នងឫស្សី ដែលមានកាតព្វកិច្ចថែរក្សាការពារ ឲ្យសិ្ថតស្ថេរគង់វង្ស នូវសម្បត្តិវប្បធម៌ជាតិ និងវប្បធម៌ចម្រុះនៃសហគមន៍ជាតិនៅព្រះរាជាណាចក្រកម្ពុជា សំដៅរក្សាបាននូវឯកភាពជាតិ សាមគ្គីភាព សន្តិភាព និងការអភិវឌ្ឍ ៕ ដោយ ៖ ជាយក្រុង
