រាល់សកម្មភាពកម្សាន្តសប្បាយនានា នៅអាមេរិក ពិសេសគឺនៅទីក្រុងញូវយ៉កដែលមានរហ័សនាមថាទីក្រុង មិនចេះដេក​ ជាទីកន្លែងសប្បាយដោយប្រមូលផ្តុំទៅដោយក្លឹបរាត្រី​​ កន្លែងកម្សាន្ត រាំលេងទល់ភ្លឺ ពេលនេះក៏ត្រូវបង្ខំចិត្ត បិទផងដែរ។ នេះជាប្រវត្តិសាស្ត្រនៅទីក្រុងនេះ ដោយសារតែការឆ្លងរាលដាលនៃវីរុសផ្លូវដង្ហើម កូវីដ-១៩។
ក្រៅពីទីក្រុងញូយ៉កនៅមានទីក្រុងជាច្រើន ក៏បានផ្អាករាល់សកម្មភាព​ដូចគ្នានោះដែរ។ ​ជាមួយគ្នានេះ មន្ទីរឃុំឃាំងនៅរដ្ឋកាលីហ្វ័រញ៉ា អាមេរិក បានសម្រេចដោះលែងអ្នកទោសមួយចំនួនដែលមានទោសស្រាល ដើម្បីកាត់បន្ថយចំនួនអ្នកទោស ងាយស្រួលទប់ស្កាត់ការឆ្លងរាលដាលវីរុសកូវីដ-១៩​។
សារព័ត៌មាន​ Los Angeles Times បានផ្សាយថា ប៉ូលិសទីក្រុង Los Angeles បានសម្រេច កាត់បន្ថយចំនួនអ្នកទោស​ ចៀសវាងការរស់នៅចង្អៀត អាចឆ្លងរាលដាលវីរុសបានយ៉ាងងាយស្រួល។ ​ការដោះលែងអ្នកទោស ដែលមានបទល្មើសតិចជាយុទ្ធសាស្ត្រមួយ​ដើម្បីការពារឆ្លងកូវីដ-១៩ យ៉ាងមានប្រសិទ្ធភាព ដែលប្រទេសមួយចំនួនបានធ្វើរួចមកហើយ។
ស្នងការប៉ូលិសទីក្រុង Los Angeles លោក​ Alex Villanueva បានបញ្ជាក់ថា យើងអាចដោះលែងអ្នកទោស មានបទល្មើសស្រាល ប៉ុន្តែត្រូវធានាដល់សន្តិសុខ សុវត្ថភាពពលរដ្ឋនៅក្នុងតំបន់។ ​កន្លងមក​ជាមធ្យម ក្នុងមួយថ្ងៃ ចាប់អ្នកទោសដល់ទៅ​៦០០នាក់យកទៅឃុំ​ ប៉ុន្តែពេលនេះ បានធ្លាក់ចុះនៅដល់តែ ៦០នាក់ប៉ុណ្ណោះ គឺចាប់តែអ្នកប្រព្រឹទ្ធបទល្មើសធ្ងន់ ។ បច្ចុប្បន្នអាមេរិក មានករណីឆ្លង ដល់ទៅ៤៥៦៧នាក់ និងស្លាប់កើនឡើងដល់​៨៥នាក់ហើយ។ ចំណែកអ្នកព្យាបាលជាសះស្បើយមានតែ៧៣នាក់ប៉ុណ្ណោះ ៕