ភ្នំពេញ៖ កញ្ញា ចំរើន សុភ័ក្ត្រ ដែលគេស្គាល់ថាជាតារាចម្រៀងផលិតកម្មហង្សមាស ត្រូវបានជនសង្ស័យម្នាក់ ធ្វើសកម្មភាពឆ្កឹះសោទ្វាររថយន្តប៉ុនប៉ងលួច តែត្រូវនាងនិងក្រុមគ្រួសារដឹងខ្លួនទាន់មើលតាមកាមេរ៉ាសុវត្ថិភាពឃើញ ក៏ទូរស័ព្ទប្តឹងសមត្ថកិច្ចនគរបាលខណ្ឌមានជ័យ ចុះមកឃាត់ខ្លួនបានភ្លាមៗ ។
ហេតុការណ៍ខាងលើនេះ បានកើតឡើងកាលពីវេលាម៉ោង ៣និង១០នាទីរំលងអាធ្រាត្រឈានចូល ថ្ងៃទី១៦ ខែមីនា ឆ្នាំ២០២០ នៅចំណុចមុខផ្ទះលេខ១៨៣ និងផ្ទះលេខ១៨៥ ផ្លូវលេខ៣១ ភូមិ ព្រែកតាឡុង សង្កាត់
ចាក់អង្រែលើ ខណ្ឌមានជ័យ រាជធានីភ្នំពេញ ។
តាមប្រភពពីមន្រ្តីនគរបាលប៉ុស្តិ៍ចាក់អង្រែក្រោម បានឲ្យដឹងថា ជនសង្ស័យមានឈ្មោះ ហ៊ឹង ប៊ុនរតនៈ ហៅម៉ាប់ ភេទ ប្រុស អាយុ ៤០ឆ្នាំ ជនជាតិខ្មែរ ទីលំនៅផ្ទះលេខ៥៧២ ផ្លូវបេតុង ភូមិ ត្នោតជ្រុំ២ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ មុខរបរ ជាងកាត់សក់ (ឃាត់ខ្លួនមានផ្ទុកសារធាតុញៀន) ។
ចំណែកជនរងគ្រោះមាន២នាក់៖ ទី១ឈ្មោះ ហ៊ល ចំរើន ភេទប្រុស អាយុ៥៦ ឆ្នាំ ជនជាតិខ្មែរ (ត្រូវជាឪពុក កញ្ញា ចំរើន សុភ័ក្ត្រ ជាតារាចម្រៀងផលិតកម្មហង្សមាស) ទីលំនៅ ផ្ទះលេខ១៨៥ ផ្លូវលេខ៣១ ភូមិព្រែកតាឡុង សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបរនៅផ្ទះ (ជាម្ចាស់រថយន្តម៉ាកព្រូស ពណ៍ស ពាក់ស្លាកលេខ ភ្នំពេញ 2AF 1505 ) ។
ជនរងគ្រោះ ទី២ឈ្មោះ ហង្ស វាសនា ភេទ ប្រុស អាយុ ៣៩ ឆ្នាំ ជនជាតិខ្មែរ ទីលំនៅ ផ្ទះលេខ ១៨៣ ផ្លូវលេខ៣១ ភូមិ ព្រែកតាឡុង សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបរនៅផ្ទះ (ជាម្ចាស់រថយន្តម៉ាកព្រូស ពណ៍ខៀវ ពាក់ស្លាកលេខ ភ្នំពេញ 2F 1790) ។
សម្ភារខូចខាត៖ ខូចសោទ្វាររថយន្តចំនួន០២គ្រឿង ៖ម៉ាកព្រូស ពណ៍ស ពាក់ស្លាកលេខ ភ្នំពេញ 2AF 1505 និង ម៉ាកព្រូស ពណ៍ខៀវ ពាក់ស្លាកលេខ ភ្នំពេញ 2F 1790 ។
មន្រ្តីដដែលបន្តថា ចំណែកវត្ថុតាងចាប់យកមាន ៖ ដែកចុងស្រួចចំនួន០១, ក្បាលសោលេខ១០ចំនួន០១, ក្បាលសោលេខ១២ចំនួន០១, ក្បាលសោលេខ១៤ចំនួន០១ ,សោបំពង់លេខ៨ចំនួន០១ , ដែកសម្រាប់ស៊កក្បាលសោចំនួន ០១ ដើម , ពិលចំនួន០១, ទុលឡឺវីសចំនួន០១, មួកសុវត្ថិភាព ពណ៍ស ចំនួន ០១ និង ម៉ូតូ០១គ្រឿងម៉ាកអាយខន ពណ៍បៃតង ពាក់ស្លាកលេខ ភ្នំពេញ 1CP 2348 ( ជារបស់ជនសង្ស័យ) ។
បើតាមប្រភពព័ត៍មានពីកញ្ញា ចំរើន សុភ័ក្ត្រ តារាចម្រៀងផលិតកម្មហង្សមាស បានបង្ហោះវីដេអូមួយតាមរយះកាមេរ៉ាសុវត្ថិភាព ក្នុងគណនីហ្វេសប៊ុករបស់ខ្លួនថា មានករណីចោរម្នាក់ បានធ្វើសកម្មភាពចូលគាស់ទ្វាររថយន្តរបស់កញ្ញា ដែលចតនៅមុខផ្ទះ បំរុងលួចយកទៅ ដោយមិនញញើតទាល់តែសោះ បើទោះជាផ្ទះកញ្ញាបានបើកភ្លើងនៅមុខផ្ទះក៏ដោយ ។ ប៉ុន្តែសំណាងហើយ ដែលចោរនោះបានបាក់សោ ខណៈដែលកំពុងចាក់គាស់ កុំអីឡានរបស់កញ្ញានឹងត្រូវបានជិះយកទៅបាត់ទៅហើយ ។
គណនីហ្វេសប៊ុករបស់កញ្ញា ចំរើន សុភ័ក្ត្រ បានសរសេរសារអរគុណដល់អធិការនគរបាលខណ្ឌមានជ័យថា៖ «នាងខ្ញុំចំរើន សុភ័ក្ត្រ សូមថ្លែងអំណរគុណដល់លោកពូ ម៉េងវិមានដារា ដែលជាអធិការខណ្ឌមានជ័យ ដែលបានចាប់ជនល្មើសគាស់រថយន្តនៅផ្ទះរបស់នាងខ្ញុំ បានត្រឹមតែមួយយប់ ក្នុងនាមនាងខ្ញុំជាប្រជាពលរដ្ឋ ពិតជាសប្បាយចិត្តយ៉ាងខ្លាំង ជាចុងក្រោយសូមឲ្យគ្រប់អង្គភាពទាំងអស់ មានសុខភាពល្អកម្លាំងមាំមួនដើម្បីជាម្លប់របស់ប្រជាពលរដ្ឋបន្តរទៀត» ។
...
បច្ចុប្បន្នជនសង្ស័យឈ្មោះ ហ៊ឹង ប៊ុនរតនៈ ហៅ ម៉ាប់ ឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់តាមនីតិវិធី ៕ភារ៉ា ដង្កោ
