ខេត្តស្ទឹងត្រែង៖ បុរស នារី២នាក់ប្តីប្រពន្ធដែលទើបនឹងរៀបការហើយថ្មោងថ្មីបានរយៈពេល៤ថ្ងៃ បានស្លាប់ទាំងពីរនាក់ ខណៈម៉ូតូឌុបគ្នាជ្រុលទៅបុករថយន្តកែច្នៃដឹកឈើឈប់ស្ងៀមដើម្បីសាងឈើដាក់រថយន្ត១ទៀតនៅលើផ្លូវជាតិលេខ៧៨ ត្រង់ចំណុចជិតផ្លូវបំបែកអូរពងមាន់ កាលពីវេលាម៉ោងប្រមាណ៨ជាង យប់ថ្ងៃទី១១ ខែមករា ឆ្នាំ២០១៦ ។
ប្រភពពីអ្នកឃើញហេតុការណ៍បាននិយាយថា ជនរងគ្រោះទាំងពីរនាក់ប្តីប្រពន្ធបានជិះម៉ូតូឌុបគ្នាលើកំណាត់ផ្លូវលេខ៧៨ ក្នុងសភាពងងឹតផងនោះ ពេលមកដល់ចំណុចកើតហេតុ ក៏ជ្រុលទៅបុករថយន្តកែច្នៃពេញទំហឹងបណ្តាលឲ្យស្លាប់ទាំងពីរនាក់តែម្តង ។ នគរបាលមូលដ្ឋានបានឲ្យដឹងថា ជនរង គ្រោះដែលស្លាប់នោះ ប្តីឈ្មោះ សំ សុខហេង អាយុ២៥ឆ្នាំ និងប្រពន្ធឈ្មោះ ម៉ៃ ស្រីមី អាយុ២៣ឆ្នាំ ។ ទាំងពីរនាក់រស់នៅភូមិកាតូត ឃុំកំភុន ស្រុកសេសាន ខេត្តស្ទឹងត្រែង ។
សមត្ថកិច្ចមូលដ្ឋានបញ្ជាក់ថា ប្តីប្រពន្ធទាំង២នាក់ ក្នុងយប់កើតហេតុបានជិះម៉ូតូឌុបគ្នាក្នុងគោលបំណងរកទិញដំឡូងមីយកទៅលក់ដែលជារបររកស៊ីរបស់ពួកគេ ។ ពេលមកដល់ចំណុចកើតហេតុ ដោយសារតែផ្លូវងងឹតមើលមិនឃើញ ក៏ជ្រុលទៅបុករថយន្តដែលចតស្ងៀមនៅលើចិញ្ចើមផ្លូវដោយគ្មានភ្លើងបំភ្លឺ ។ ក្រោយពេលកើតហេតុ ម្ចាស់រថយន្តបានគេចខ្លួនបាត់ បន្សល់តែសព និងម៉ូតូជនរងគ្រោះម៉ាក សេ ១២៥ ស៊េរីឆ្នាំ ២០១៣ ពាក់ស្លាកលេខ ភ្នំពេញ 1AW-4273 ។
បច្ចុប្បន្ន សពទាំងពីរនាក់ប្តីប្រពន្ធ ត្រូវបាននគរបាលចរាចរណ៍ដឹកយកទៅផ្ទះរបស់ពួកគេដើម្បីឲ្យគ្រួសាររៀបចំធ្វើបុណ្យតាមប្រពៃណី ។ រីឯរថយន្តបង្ក និងម៉ូតូ ត្រូវបាននគរបាលចរាចរណ៍យកទៅរក្សាទុកនៅស្នងការដ្ឋាននគរបាលខេត្តដើម្បីឲ្យម្ចាស់រថយន្តចូលខ្លួនមកដោះស្រាយ ៕
