ភ្នំពេញ៖ ជនសង្ស័យប្រុសស្រី៣នាក់ ជាប់ពាក់ព័ន្ធនឹងករណីចែកចាយ និងសេពគ្រឿងញៀន បង្កអសន្តិសុខក្នុងមូលដ្ឋានត្រូវបានកម្លាំងអាវុធហត្ថក្រុងភ្នំពេញ ចុះប្រតិបត្តិការបង្ក្រាបចាប់ឃាត់ខ្លួនបាន រួមទាំងវត្ថុតាង ។

កាលពីវេលាម៉ោង៨ និង៣០ ព្រឹកថ្ងៃទី១២ ខែមករា ឆ្នាំ២០១៦ ស្ថិតនៅសំណង់អនាធិបតេយ្យក្នុងក្រុម១៤ ភូមិត្រពាំងឈូក សង្កាត់ទឹកថ្លា ខណ្ឌសែនសុខ ។

ជនសង្ស័យឃាត់ខ្លួនបានទាំង៣នាក់ ទី១-ឈ្មោះ សុខ ស្រីណុច ភេទស្រី អាយុ១៦ឆ្នាំ មុខរបរជាអ្នកបំរើក្នុងខារ៉ាអូខេ ស្នាក់នៅមិនពិតប្រាកដ ទី២-ឈ្មោះ សុខ ស្រីនិត ភេទស្រី អាយុ១៨ឆ្នាំ មុខរបរជាអ្នកបំរើខារ៉ាអូខេ ស្នាក់នៅមិនពិតប្រាកដ ទី៣-ឈ្មោះ នៅកុសល់ ភេទប្រុស អាយុ២២ឆ្នាំ មុខរបរជាងផ្សារដែកស្នាក់នៅបន្ទប់ជួល ភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ ។

ក្រោយពីឃាត់ខ្លួនជនសង្ស័យប្រុសស្រី ទាំង៣នាក់ខាងលើ សមត្ថកិច្ចដកហូតបាន សម្ភារៈសម្រាប់សេពគ្រឿងញៀនមួយចំនួនទៀត ថង់សម្រាប់ច្រកគ្រឿងញៀនមួយចំនួន និងទូរស័ព្ទខូចចំនួន៣គ្រឿង ។

បច្ចុប្បន្នជនសង្ស័យទាំង៣នាក់ បន្ទាប់ពីឃាត់ខ្លួនបាន នាំទៅធ្វើការសាកសួរនៅ ផ្នែកជំនាញ កងរាជអាវុធហត្ថក្រុងភ្នំពេញ ដើម្បីកសាងសំណុំចាត់ការទៅតាមនិតិវិធី ៕

ដោយ៖ តុង សីហា