ខេត្តបាត់ដំបង៖ ជនសង្ស័យម្នាក់ត្រូវបានសមត្ថកិច្ចតាមដានស្រាវជ្រាវ ស៊ើបអង្កេតឈានដល់ ការចាប់ឃាត់ខ្លួនបានក្រោយពីជនសង្ស័យវាយសម្លាប់បុរសម្នាក់ជាគូទំនាស់និងគ្នាបន្ទាប់ពីពួកគេឈ្លោះគ្នាក្នុងវង់ផឹកស៊ីរួចហើយ។ ជនសង្ស័យត្រូវបានឃាត់ខ្លួននៅវេលាម៉ោង១០ព្រឹក ថ្ងៃទី១២ ខែមករា ឆ្នាំ២០១៦ ក្រោយពីវាយសម្លាប់ជនរងគ្រោះកាលពីវេលាម៉ោង៨យប់ថ្ងៃទី១១ ខែមករា ឆ្នាំ២០១៦នៅចំណុចវាលស្រែមួយកន្លែងស្ថិតក្នុងភូមិក្រពើសែសិប ឃុំបឹង៥ ស្រុកបវេល ខេត្តបាត់ដំបង។
ជនសង្ស័យមានឈ្មោះ វិន ចាន់ ភេទប្រុស អាយុ៤២ឆ្នាំ ចំណែកជនរងគ្រោះឈ្មោះ រុន រឿន ភេទប្រុស អាយុ៥៥ឆ្នាំ ពួកគេទាំង២នាក់ រស់នៅក្នុងភូមិកើតហេតុខាងលើជាមួយគ្នា។
បើតាមប្រភពព័ត៌មានពីសមត្ថកិច្ចប្រាប់ឱ្យដឹងថា កាលពីវេលាម៉ោង៦ និង៣០នាទីព្រឹកថ្ងៃទី១២ ខែមករា មានប្រជាពលរដ្ឋម្នាក់បានជិះម៉ូតូដើរលក់បន្លែតាមភូមិ បានធ្វើដំណើរឆ្លងកាត់នៅចំណុចខាងលើក៏ប្រទះឃើញមានមនុស្សដេកស្លាប់នៅលើដីស្រែដែលគេបានភ្ជួររួចហើយក្បែរផ្លូវលំមួយកន្លែង ស្ថិតក្នុងភូមិក្រពើសែសិប ឃុំបឹង៥ ស្រុកបវេល ខេត្តបាត់ដំបង ។ បន្ទាប់ពីមានការភ្ញាក់ផ្អើលនោះរួចមកកំលាំងសមត្ថកិច្ចនៃអធិការដ្ឋាននគរបាលស្រុកបវេលបានចុះទៅត្រួតពិនិត្យឃើញសាកសពជនរងគ្រោះត្រូវបានគេវាយសម្លាប់ដោយឈើជ្រុងបែកក្បាលផ្នែកខាងក្រោយ។សមត្ថកិច្ចក៏បានបើកការស្រាវជ្រាវស៊ើបអង្កេតទើបឈានដល់ការចាប់ឃាត់ខ្លួនបានជនសង្ស័យតែម្តង។
បើតាមប្រភពព័ត៌មានពីប្រជាពលរដ្ឋដែលរស់នៅក្នុងភូមិបាននិយាយថា មុនយប់កើតហេតុរវាងជនរងគ្រោះនិងជនសង្ស័យបានផឹកស្រាជុំគ្នាម្តងទៅផឹកផ្ទះជនរងគ្រោះហើយបន្ទាប់មកបាននាំគ្នាទៅផឹកផ្ទះជនសង្ស័យទៅវិញទៅមក ហើយជនរងគ្រោះនិងជនសង្ស័យកន្លងមកធ្លាប់មានទំនាស់គ្នាជាញឹកញាប់ជាមួយគ្នានឹងរឿងព្រំដីផង និងរឿងបញ្ហាមួយចំនួនទៀត។ ក៏ប៉ុន្តែអ្នកទាំងពីរនាក់នោះទោះបីឈ្លោះគ្នាយ៉ាងណាក៏ដោយ ក៏គេនៅតែស្កាត់រកគ្នាផឹកស៊ីជាមួយគ្នាជារៀងរាល់ថ្ងៃផងដែរ។ នៅយប់កើតហេតុគឺឮពួកគេឈ្លោះប្រកែកគ្នា ហើយពួកគេផឹកស្រាស្រវឹងជោគជាំរៀងៗខ្លួនខុសពីសព្វមួយដង។ ក៏ប៉ុន្តែនៅពេលពួកគេឈ្លោះគ្នាប្រជាពលរដ្ឋមិនចាប់អារម្មណ៍នោះទេដោយសារជាទម្លាប់ឱ្យតែផឹកស៊ីឈ្លោះប្រកែកគ្នាបែបនេះ។ លុះភ្លឺឡើងស្រាប់តែមានប្រជាពលរដ្ឋប្រទះឃើញសាកសពជនរងគ្រោះដេកស្លាប់ទើបបង្កឱ្យមានការភ្ញាក់ផ្អើល។
នៅចំពោះមុខសមត្ថកិច្ចជនសង្ស័យបានឆ្លើយសារភាពថាពិតជាយកឈើជ្រុងវាយសម្លាប់ជនរងគ្រោះដោយសារផឹកស៊ីនិយាយឌឺដងដាក់គ្នាបញ្ហាទំនាស់ដីធ្លី។ ជនសង្ស័យបច្ចុប្បន្ននេះត្រូវបាននគរបាលស្រុកបវេលចាប់បញ្ជូនទៅកាន់ស្នងការដ្ឋាននគរបាលខេត្តបាត់ដំបង ដើម្បីយកទៅចាត់ការតាមផ្លូវច្បាប់៕
ដោយ៖ សំ វិច្ឆិកា
