ការប្រគុំតន្ដ្រីដែលមានគោលបំណងរៃអង្គាសថវិកាសម្រាប់ប្រយុទ្ធប្រឆាំងនឹងមេរោគCovid-19ដែលរៀបចំឡើងដោយLady Gaga និងចូលរួមសហការជាមួយអង្គការសុខភាពពិភពលោកនឹងត្រូវចាក់ផ្សាយនៅថ្ងៃសៅរ៍ ទី១៨ ខែមេសា ខាងមុខនេះ។ ព្រឹត្តិការណ៍នេះក៍នឹងត្រូវបានផ្សាយបន្ដផ្ទាល់នៅលើបណ្ដាញសង្គមដូចជាFacebook  YouTube សម្រាប់ចែកចាយទូទាំងពិភពលោកផងដែរ។ នៅលើកម្មវិធីនៃការប្រគុំតន្ដ្រីក្រោមប្រធានបទឈ្មោះថា«One world ៖ Together at home»ដែលមានន័យថា” ពិភពលោកតែមួយរួមគ្នានៅផ្ទះ”។ ការប្រគុំតន្ដ្រីនេះក៍មានការចូលរួមពីសំណាក់សិល្បករល្បីៗជាច្រើនរូបដូចជា Elton John , Stevie wonder, Billie Ellishនិង Lizzo ជាដើម។ តារាទាំងអស់នឹងសម្ដែងចេញពីក្នុងផ្ទះរបស់ពួកគេ។

កាលពីថ្ងៃច័ន្ទ ទី ០៦ ខែមេសាតារាចម្រៀងប៉ុបល្បីរូបនេះបានប្រកាសតាមបណ្ដាញសង្គមធ្វីតធឺថា  នាងបានប្រមូលថវិកាចំនួន៣៥លានដុល្លារត្រូវបានរៃអង្គាសតាមរយៈការបរិច្ចាគរបស់ក្រុមហ៊ុនធំៗនិងសប្បុរសធម៌ដើម្បីជួយប្រយុទ្ធប្រឆាំងនឹងវីរុសCovid-19។

ចាប់តាំងពីការចាប់ផ្ដើមមានវិបត្ដិជំងឺCovid-19 សិល្បករល្បីៗជាច្រើននៅសហរដ្ឋអាមេរិកក៏ដូចជាបណ្ដាប្រទេសផ្សេងទៀតបានចាប់ផ្ដើមគំនិតផ្ដួចផ្ដើមដើម្បីជួយបុគ្គលិកសុខាភិបាលឫប្រមូលអំណោយសម្រាប់អ្នកខ្វះខាត៕ ដោយ៖ម្លិះ