អាហ្វ្រិកខាងត្បូង ៖ កាលពីថ្ងៃសុក្រម្សិលមិញនេះប្រទេសអាហ្វ្រិកខាងត្បូងបានចាប់ផ្តើមបន្ធូរបន្ថយការបិទប្រទេសក្នុងគ្រាអាសន្នយ៉ាងតឹងរ៉ឹងរបស់ខ្លួនដោយសារតែវីរុសកូវីដ-19ដោយបានអនុញ្ញាតឲ្យឧស្សាហកម្មមួយចំនួនបើកដំណើរការឡើងវិញ បន្ទាប់ពីការរឹតត្បិតរយៈពេល ៥ សប្តាហ៍ដោយធ្វើឲ្យសេដ្ឋកិច្ចដែលកំពុងជួបការលំបាករបស់ខ្លួនធ្លាក់កាន់តែជ្រៅ។
ប្រទេសដែលមានសេដ្ឋកិច្ចពឹងផ្អែកឧស្សាហកម្មច្រើនបំផុតនៅទ្វីបអាហ្វ្រិកមួយនេះកំពុងមានបញ្ហារួចទៅហើយនៅពេលដែលការបិទប្រទេសតាំងពីថ្ងៃទី ២៧ ខែមីនាដើម្បីទប់ស្កាត់ការរីករាលដាលនៃការឆ្លងជំងឺកូវីដ-19 ។ ក្នុងនោះដើម្បីប្រយុទ្ធប្រឆាំងនឹងការបំផ្លាញសេដ្ឋកិច្ចឡើងវិញនោះរដ្ឋាភិបាលបានអនុវត្តវិធីសាស្ត្រជាបណ្តើរៗ និងជាជំហានដើម្បីបើកដំណើរការប្រទេសនេះឡើងវិញចាប់ពីថ្ងៃទី ១ ឧសភា ឆ្នាំ២០២០ នេះ។
លោក Ebrahim Patel រដ្ឋមន្ត្រីក្រសួងពាណិជ្ជកម្ម និងឧស្សាហកម្មអាហ្រ្វិកខាងត្បូងបាននិយាយថា កម្មករប្រមាណ ១.៥ លាននាក់នៅក្នុងឧស្សាហកម្មដែលបានជ្រើសរើសនឹងវិលត្រឡប់មកធ្វើការវិញនៅដំណាក់កាលបន្ទាប់ក្រោមលក្ខខណ្ឌសុខភាពរឹងប៉ឹង។ ឧស្សាហកម្មផលិតសម្លៀកបំពាក់ វាយនភ័ណ្ឌ និងវេចខ្ចប់ស្ថិតក្នុងចំណោមឧស្សាហកម្មដែលត្រូវបានអនុញ្ញាតឲ្យបើករោងចក្រឡើងវិញ មុនគេ។ ដោយឡែកភោជនីយដ្ឋានក៏នឹងបើកឡើងវិញផងដែរ ប៉ុន្តែសម្រាប់តែការដឹកជញ្ជូនតាមផ្ទះប៉ុណ្ណោះ ខណៈដែលបម្រាមចម្រូងចម្រាសលើការលក់បារី និងស្រានឹងនៅតែមានប្រសិទ្ធភាពដដែល។ ចំណែកសកម្មភាពខាងក្រៅមួយចំនួនដូចជា ការជិះកង់ ការដើរ និងរត់នឹងត្រូវបានអនុញ្ញាតជាធម្មតាប៉ុន្តែសម្រាប់តែបីម៉ោងនៅពេលព្រឹកប៉ុណ្ណោះ ខណៈដែលគម្លាតសង្គម និងការពាក់ម៉ាស់នៅទីសាធារណៈ និងនៅកន្លែងធ្វើការនឹងធ្វើឡើងជាចាំបាច់ ។
ជាមួយគ្នានេះដែរលោក Nkosazana Dlamini-Zuma រដ្ឋមន្ត្រីក្រសួងសហករណ៍ព្រមានថា “ក្រុមហ៊ុនទាំងឡាយណាដែលរំលោភបទបញ្ជានឹងត្រូវបង្ខំឲ្យបិទទ្វារ” ដាច់ខាត។
ជាមួយនេះដែរលោកប្រធានាធិបតី Cyril Ramaphosa បានលើកឡើងថាការសម្រេចចិត្តក្នុងការបន្ធូរបន្ថយការរឹតបន្តឹងនៃការបិទប្រទេសនេះធ្វើឡើងក្នុងគោលបំណងដើម្បីឲ្យមានតុល្យភាពរវាងការការពារសុខភាពសាធារណៈ និងសេដ្ឋកិច្ច ខណ:ប្រជាជនរបស់យើងត្រូវការបរិភោគ និងត្រូវការរកប្រាក់ចំណូល” ដោះស្រាយជីវភាពប្រចាំថ្ងៃ៕ដោយ÷ប្រាថ្នា
