ភ្នំពេញ៖. លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា បានលេីកឡេីងថា ទំហំសហហិរញ្ញប្បទានរបស់ធនាគារ សហគ្រាសធុនតូច និងមធ្យម (SMEs Bank) កើនឡើងដល់១៥០លានដុល្លារអាមេរិកដែលត្រៀមសម្រាប់ជួយដល់វិស័យមួយនេះ នៅក្នុងប្រទេសកម្ពុជា។
លោក តែ តាំងប៉ បានអះអាងបែបនេះក្នុងសន្និសីទសារព័ត៌មាន ស្ដីពី «គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យម និងបញ្ហាប្រឈមរបស់ធនាគារសហគ្រាសធុនតូច និងមធ្យម» នៅរសៀលថ្ងៃទី៧ ឧសភានេះ។
លោក តែ តាំងប៉ បានបន្តថា ពីដំបូងធនាគារ SMEs មានទុនដំបូងចំនួន១០០លានដុល្លារប៉ុណ្ណោះ ប៉ុន្ដែក្រោយមកធនាគារឯកជនចំនួន៣៣ បានសហ ការជាមួយធនាគារ SMEs ដែលកើនទុនរហូត ដល់ ១៥០លានដុល្លារអាមេរិក។
សូមរំលឹកថា រដ្ឋាភិបាលបានបង្កើតឲ្យមានជាធនាគារសហគ្រាសធុនតូច និងមធ្យម ដើម្បីសម្រាប់ផ្តល់ប្រាក់កម្ចី ដល់ម្ចាស់សហគ្រាសធនតូច និងមធ្យម ដែលមានអត្រាការទាប ផ្តល់ជូនដល់អ្នកវិនិយោគលើវិស័យមួយនេះត្រឹមតែ៧ភាគរយក្នុង១ឆ្នាំ។
សម្រាប់លោក តែ តាំងប៉ ចំពោះឥណទាននេះ ផ្ដល់ឱកាសឲ្យម្ចាស់សហគ្រាសធុនតូច និងមធ្យម ទទួលឥណទាន ដែលទុនបង្វិល២០ម៉ឺនដុល្លារ ។ ដោយឡែកចំពោះការវិនិយោគទៅលើគ្រឿងម៉ាស៉ីន បានរហូត ដល់៣០ម៉ឺនដុល្លារ ក្នុងមួយក្រុមហ៊ុន ៕ សំរិត
