ភ្នំពេញ៖ បុរសម្នាក់ជាអ្នករត់រ៉ឺម៉ក់ម៉ូតូកង់បី បានរងរបួសបែកក្បាលឈាមហូរស្រោចជោកខ្លួន ដោយសារតែត្រូវរថយន្ដកាមរីហាយព្រីតបុកពេញទំហឹង ហើយត្រូវបានសាច់ញាតិដឹកតាមរ៉ឺម៉កកង់បីយកទៅសង្គ្រោះនៅមន្ទីរពេទ្យភ្លាមៗ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង២០និង១០នាទីថ្ងៃទី១៩ ខែមករា ឆ្នាំ២០១៦ តាមបណ្ដោយផ្លូវលេខ១៦៣ ទល់មុខយានដ្ឋាន យឹម សុគុណ ស្ថិតក្នុងសង្កាត់ទួលទំពូងទី២ ខណ្ឌចំការមន រាជធានីភ្នំពេញ។
ប្រភពព័ត៌មានពីសាក្សីនៅជិតកន្លែងកើតហេតុបានអោយដឹងថា នៅមុនពេលកើតហេតុ គេបានឃើញមានម៉ូតូរ៉ឺម៉កម៉កកង់បីមួយគ្រឿងបើកបរដោយបុរសម្នាក់ធ្វើដំណើរតាមបណ្ដោយផ្លូវលេខ១៦៣ទិសដៅពីត្បូងទៅជើង លុះមកដល់ចំណុចកើតហេតុ មានរថយន្ដម៉ាកកាមរីហាយព្រីត ពណ៍ទឹកប្រាក់ ពាក់ស្លាកលេខ ភ្នំពេញ 2P-1628 បើកបរដោយបុរសនារីពីរនាក់ធ្វើដំណើរបញ្ច្រាស់ទិសគ្នាក៏ជ្រុលបុកចំក្បាលរ៉ឺម៉កម៉ូតូកង់បីពេញទំហឹងបណ្ដាលអោយម្ចាស់ម៉ូតូរ៉ឺម៉កកង់បីរងរបួសក្បាល ចំណែករថយន្ដ និងរ៉ឺម៉កកង់បីរងកាខូចខាត ។
ប្រភពដដែលបានបន្តថា ក្រោយកើតហេតុជនរងគ្រោះត្រូវបានសាច់ញាតិដឹកតាមរ៉ឺម៉កម៉ូតូកង់បីយកទៅសង្គ្រោះនៅមន្ទីរពេទ្យ។ ក្រោយមកកម្លាំងសមត្ថកិច្ចមូលដ្ឋានបានចុះដល់កន្លែងកើតហេតុ និងសម្របសម្រួលភាគីទាំងសងខាងដោយភាគីខាងរថយន្ដព្រមសងថ្លៃការខូចខាតទៅអោយខាងរ៉ឺម៉កម៉ូតូកង់បីចំនួន២៥០ដុល្លារដើម្បីបញ្ចប់រឿងនៅកន្លែងកើតហេតុតែម្ដង ៕
ដោយ៖ ភារ៉ា ដង្កោ
