ខេត្តស្ទឹងត្រែង៖ រថយន្តពីរគ្រឿងបើកបរខ្វះការប្រុងប្រយ័ត្ន ដោយបើកជែងគ្នាជ្រុលមកបុកម៉ូតូជនរងគ្រោះដែលកំពុងជិះបញ្ច្រាសគ្នាបណ្តាលឱ្យរងរបួសធ្ងន់ទាំងពីរនាក់ ក្នុងនោះស្ត្រីជាប្រពន្ធរងរបួសធ្ងន់ដាច់ជើងស្តាំ។ ហេតុការណ៍នេះបានកើតឡើងកាលពីវេលាម៉ោង១៨ៈ៣០នាទី ថ្ងៃទី០១ ខែមិថុនា ឆ្នាំ២០២០ នៅចំណុចបង្គោលគីឡូម៉ែត្រលេខ៤៦៨ លើកំណាត់ផ្លូវជាតិលេខ៩ ស្ថិតក្នុងភូមិអូរត្រែល ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង ។

បើតាមរបាយការណ៍នគបាលសណ្តាប់ធ្នាប់នៃអធិការដ្ឋាននគរបាលស្រុកថាឡាបរិវ៉ាត់ បានឲ្យដឹងថា រថយន្តម៉ាកកាមរីឆ្លាមពណ៌ទឹកប្រាក់ ពាក់ស្លាកលេខបាត់ដំបង2B-6351បើកបរពីជើងទៅត្បូងដោយឈ្មោះប្រាក់ ដារា ភេទប្រុសអាយុ២៧ឆ្នាំ រស់នៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ចំណែករថយន្តមួយគ្រឿងទៀតបានបើករត់គេចបាត់ស្រមោលបាន
មកបុកម៉ូតូជនរងគ្រោះដែលបើកបរពីត្បូងទៅជើងបញ្ច្រាសទិសគ្នាធ្វើឲ្យជនរងគ្រោះបើកម៉ូតូឌុបគ្នា រងរបួសធ្ងន់ទាំងពីរនាក់ ក្នុងនោះប្រពន្ធរងរបួសដាច់ជើងស្តាំ។

ជនរងគ្រោះអ្នកបើកបរម៉ូតូត្រូវជាប្តីឈ្មោះចាន់ សុផិត ភេទប្រុស អាយុ៥៧ឆ្នាំ មុខរបរយោធាយោធភូមិទី១ រស់នៅភូមិថ្មី សង្កាត់ ក្រុង ខេត្តស្ទឹងត្រែង រីឯប្រពន្ធរងរបួសដាច់ជើងស្តាំឈ្មោះម៉ែន សាមិត្ត អាយុ៥១ឆ្នាំ មុខរបរគ្រូបង្រៀន រស់នៅជាមួយគ្នា។

ក្រោយកើតហេតុត្រូវបានរថយន្តក្រុមគ្រួសារដឹកយកទៅសង្គ្រោះបន្ទាន់នៅមន្ទីរពេទ្យយោធភូមិភាគទី១។ ចំណែករថយន្តបង្កនិងម៉ូតូជនរងគ្រោះ ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកថាឡាបរិវ៉ាត់ រង់ចាំដោះស្រាយពេលក្រោយ។

បច្ចុប្បន្នជនរងគ្រោះជាប្រពន្ធត្រូវបានបញ្ជូនបន្តទៅសង្គ្រោះបន្ទាន់នៅមន្ទីរពេទ្យរាជធានីភ្នំពេញ ដោយសារតែស្ថានភាពរបួសធ្ងន់ ហូរឈាមច្រើនពេក ចំណែកប្តីនៅសម្រាកព្យាបាលនៅមន្ទីរពេទ្យយោធភូមិទី១ដដែល៕ដោយមាស សុផាត