ស្ថានភាពកូវីដ១៩នៅលើពិភពលោកបន្តកើនឡើងដដែល ដោយមកទល់ពេល​នេះ មានអ្នកឆ្លងជាង៦,៦លាននាក់​ជុំវិញពិភពលោក​ ហេីយប្រទេសជាច្រើនក៏​បានសម្រេចបើកទ្វារសេដ្ឋកិច្ចរបស់ខ្លួន។ អង្គការសុខភាពពិភពលោកបានព្រមានថា ហានិភ័យនៃការឆ្លងកូវីដ១៩ លើក​ទីពីរ អាចនឹងគ្រោះថ្នាក់ជាងមុនបើមិនមានវិធានការទប់ស្កាត់បានល្អ ក្នុងពេលបើកទ្វារដំណើរការសេដ្ឋកិច្ច ។
គិតមកដល់ព្រសកថ្ងៃទី ៥ខែមិថុនា អ្នកជំងឺកូវីដ១៩ នៅជុំវិញពិភពលោក បានកើនឡើង ជាង ៦,៦ លាននាក់ ។ បើតាមការចេញផ្សាយរបស់ Worldometers ដែលជាគេហទំព័រតាមដាន និងផ្សព្វផ្សាយតួលេខ អំពីអ្នកជំងឺកូវីដ១៩ នៅពិភពលោក បានបញ្ជាក់ថា រហូតមកដល់បច្ចុប្បន្ន អ្នកឆ្លងជំងឺនេះបានកើនឡើងជាង៦៦៩២ ៥២២ នាក់ ។
ប្រភពបន្តថា ក្នុងចំណោមអ្នកឆ្លងជំងឺកូវីដ១៩ ទាំងនោះ មាន៣៩២ ២៨៦ នាក់​បានបាត់បង់ជីវិត ។ ប្រភពព័ត៌មានដដែលបានបញ្ជាក់ថា អ្នកជំងឺ៣២៣០ ១០៤នាក់បានជាសះស្បើយផងដែរ ។
សូមបញ្ជាក់ថា វីរុសកូវីដ១៩ ផ្ទុះឡើងដំបូងគេ នៅក្នុងខែធ្នូ ឆ្នាំ២០១៩ នាទីក្រុងវូហាន ខេត្តហ៊ូប៉ី ភាគកណ្តាលប្រទេសចិន ។ មកទល់នឹងបច្ចុប្បន្ននេះ អ្នកជំនាញវេជ្ជសាស្ត្រ មិនទាន់រកឃើញថ្នាំព្យាបាល ឬវ៉ាក់សាំងបង្ការជាក់លាក់នៅឡើយ។
សហរដ្ឋអាមេរិក, ប្រេស៊ីល, រុស្ស៊ី, អេស្ប៉ាញ, អង់គ្លេស ។ល។ ជាប្រទេសដែលមានអ្នកឆ្លងជំងឺកូវីដ១៩ច្រើនជាងគេបំផុត ខណៈជំងឺនេះ ត្រូវគេដឹងថា បានឆ្លងរាតត្បាតនៅលើដែនដី និងប្រទេស ប្រហែល២៩៩នៅជុំវិញពិភពលោក ៕