ខេត្តកំពង់ស្ពឺ៖ កាលពីថ្ងៃទី០៦ ខែមិថុនា ឆ្នាំ២០២០ វេលាម៉ោង១០ និង ៣០នាទី ដោយបានទទួលព័ត៌មានថាមានមុខសញ្ញាជួញដូរគ្រឿងញៀនម្នាក់តែងតែធ្វើសកម្មភាពចែកចាយថ្នាំញៀននៅកន្លែងលេងស្នូកឃ័រ ស្ថិតក្នុងភូមិព្រៃក្តួច ឃុំភ្នំតូច ស្រុកឧដុង្គ ។ ជនសង្ស័យឈ្មោះ អ៊ូច ឡេវ ភេទប្រុស អាយុ២៤ឆ្នាំ ត្រូវបានកម្លាំងនគរបាលស្រុកឧដុង្គឃាត់ខ្លួនរួមជាមួយវត្ថុតាងម្សៅក្រាមពណ៌សសង្ស័យជាគ្រឿងញៀនចំនួន១៥កញ្ចប់ និងទូរស័ព្ទដៃ ១ គ្រឿង។
តាមចម្លេីយបឋមរបស់ជនសង្ស័យខាងលេីសមត្ថកិច្ចបន្ដស្រាវជ្រាវរកអ្នកពាក់ព័ន្ធផ្ដល់និងចែកចាយបន្ដ រហូតធ្វេីការឃាត់ខ្លួនបានមុខសញ្ញាមួយចំនួនទៀត ក្នុងនោះមាន៖ ឈ្មោះឡុច កាលីន ភេទប្រុស អាយុ២៤ឆ្នាំ រស់នៅភូមិយោសជោ ឃុំជើងរាស់ ស្រុកឧដុង្គ ឃាត់ខ្លួនកាលពីវេលាម៉ោង១៨និង៣០នាទី នៅចំណុចភូមិត្រពាំងស្គន់ ឃុំពាំងល្វា ស្រុកឧដុង្គ ដកហូតបានម្សៅក្រាមពណ៌សសង្ស័យជាគ្រឿងញៀន ១២កញ្ចប់ និងម៉ូតូម៉ាកហុងដា សេ១២៥ ពណ៌ក្រហម ១គ្រឿង។
លោកវរសេនីយ៍ឯក ខឹម សាម៉ុន អធិការនគរបាលស្រុកឧដុង្គ បានបញ្ជាក់ថាក្រោយឃាត់ខ្លួនមុខសញ្ញាសង្ស័យទី២បាន លោកបានរាយការណ៍សុំយោបល់ដឹកនាំចង្អុលពីលោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ និងមានការឯកភាពពីតំណាងអយ្យការ កម្លាំងនគរបាល បានឈានទៅឃាត់ខ្លួនជនសង្ស័យ ២នាក់បន្ថែមទៀតដែលប្រតិបត្ដិការនេះបន្ដរហូតដល់វេលាម៉ោង១៩និង៣០នាទី ទើបឃាត់បានឈ្មោះ សុំ សារ៉ាយ ភេទប្រុស អាយុ២២ឆ្នាំ រស់នៅភូមិបន្ទាយខ្មែរ ឃុំជើងរាស់ ស្រុកឧដុង្គ និងឆែកឆេររកឃើញម្សៅក្រាមពណ៌សសង្ស័យជាគ្រឿងញៀន៥កញ្ចប់ ទូរស័ព្ទដៃ១ គ្រឿង និងឧបករណ៍កែច្នៃសម្រាប់ប្រើប្រាស់គ្រឿងញៀនមួយចំនួនទៀត ។
ក្រោយសាកសួរជនសង្ស័យបានសារភាពថាខ្លួនបានទិញគ្រឿងញៀនពីឈ្មោះ ហេង តុង ភេទប្រុស អាយុ១៩ឆ្នាំរស់នៅភូមិអង្គសេរី ឃុំជើងរាស់ ស្រុកឧដុង្គ នគរបាលក៏បានបន្តឃាត់ឈ្មោះ ហេង តុង ឆែកឆេររកឃើញ ម្សៅក្រាមពណ៌សសង្ស័យថាជាគ្រឿងញៀន ១៩កញ្ចប់ , ជញ្ចីងសម្រាប់ថ្លឹងគ្រឿងញៀនចំនួន ០១គ្រឿង, ម៉ូតូម៉ាកវីនន័រ១គ្រឿង និងឧបករណ៍កែច្នៃសម្រាប់ប្រើប្រាស់មួុយចំនួនទៀត ។
បច្ចុប្បន្នជនសង្ស័យរួមជាមួយវត្ថុតាងផ្នែកប្រឆាំងគ្រឿងញៀន នៃអធិការដ្ឋានស្រុកបានកសាងសំណុំរឿងបញ្ជូនទៅការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ដកំពង់ស្ពឺដេីម្បីចំណាត់ការបន្ត ៕ សសម
