ភ្នំពេញ៖ ជនសង្ស័យពីរនាក់ធ្វើសកម្មភាពឆក់យកទូរស័ព្ទគេមិនបានសម្រេចក៏បើកម៉ូតូរត់ ត្រូវបានប្រជាពលរដ្ឋធ្វើដំណើរតាមដងផ្លូវឃើញនាំគ្នាជិះម៉ូតូដេញតាមពីក្រោយ ហើយដោយជនសង្ស័យភ័យស្លន់ស្លោ ពេកបានផ្តួលម៉ូតូចោល រួចនាំគ្នារត់គេចខ្លួនបាត់សម្រោល។
ហេតុការណ៍នេះបានកើតទ្បើងនៅត្រង់ចំណុចក្បែររូបសំណាកយាយពេញតាមបណ្តោយផ្លូវលេខ៥១ ស្ថិតក្នុងសង្កាត់វត្តភ្នំ ខណ្ឌដូនពេញ កាលពីវេលាម៉ោង១១និង២០នាទីយប់ថ្ងៃទី២ ខែកក្កដា ឆ្នាំ២០២០។
សមត្ថកិច្ចបានឲ្យដឹងថា ម៉ូតូរបស់ជនសង្ស័យម៉ាកហុងដាស្គូពី ពណ៌ស ពាក់ស្លាកលេខ ភ្នំពេញ1BC-4065។
ប្រភពព័ត៌មាននៅកន្លែងកើតហេតុបានឲ្យដឹងថា នៅមុនកើតហេតុគេឃើញជនរងគ្រោះ២នាក់ជិះម៉ូតូសង់កូរ៉េមិនចាំស្លាកលេខមកឈប់នៅត្រង់ចំណុចកើតហេតុ ។ មួយសន្ទុះក្រោយមកក៏មានមុខជនសង្ស័យ២នាក់បានបើកម៉ូតូទៅឈប់ក្បែរនោះដែរ រួចហើយស្រាប់តែធ្វើសកម្មភាពវាយទៅលើជនរងគ្រោះនិងឆក់យកទូរស័ព្ទដៃមួយគ្រឿងពីដៃជនរងគ្រោះតែមិនបានសម្រេចឡើយ។ ភ្លាមៗនោះជនរងគ្រោះបានស្រែកឆោឡោ បណ្តាលឲ្យជនសង្ស័យភ័យស្លន់ស្លោក៏នាំគ្នារត់ឡើងជិះម៉ូតូរត់គេចខ្លួន តែត្រូវបានប្រជាពលរដ្ឋដែលធ្វើដំណើរតាមដងផ្លូវឃើញក៏នាំគ្នាជិះម៉ូតូដេញតាមពីក្រោយ រហូតទៅដល់ចំណុចក្បែរខាងជើងរង្វង់មូលវត្តភ្នំ តាមបណ្តោយផ្លូវ លេខ៤៧ ស្ថិតក្នុងសង្កាត់វត្តភ្នំ ខណ្ឌដូនពេញ ដោយជនសង្ស័យភ័យខ្លាំងពេកក៏បានផ្តួលម៉ូតូខ្លួនចោល រួចនាំគ្នារត់គេចខ្លួនបាត់ស្រមោលទៅ។
បន្ទាប់ពីកើតហេតុសមត្ថកិច្ចមូលដ្ឋានបានចុះទៅយកម៉ូតូជនសង្ស័យទៅរក្សាទុកនៅប៉ុស្តិ៍នគរបាលរដ្ឋបាលវត្តភ្នំ ដើម្បីធ្វើការស្រាវជ្រាវស្វែងរកចាប់ខ្លួនជនសង្ស័យយកមកផ្តន្ទាទោសទៅតាមផ្លូវច្បាប់៕ជ្រោយពេជ្រ
