លោកនូ ភឿង អញ្ជើញជាអធិបតីពិធីបុណ្យរុក្ខាទិវា៩កក្កដានៅវត្តបព្វវនារាម

ចែករំលែក៖

​ខេត្តក្រចេះ ៖ នៅព្រឹកថ្ងៃទី១៣ ខែកក្កដា ឆ្នាំ២០១៥ នៅក្នុងបរិវេណវត្តបព្វវនារាម (ហៅវត្តស្រែរនាមខាងជើង) ភូមិស្រែរនាម ឃុំឃ្សឹម ស្រុកស្នួល ខេត្តក្រចេះ មានរៀបចំពិធី បុណ្យ​រុក្ខាទិវា ៩កក្កដា ឆ្នាំ២០១៥ ក្រោមអធិបតីភាព លោកនូ ភឿង ប្រធានក្រុមប្រឹក្សាភិបាលខេត្តក្រចេះ និងមានការអញ្ជើញចូលរួមពីនៅហឿ ស៊ីយ៉ែម អភិបាលរងខេត្តក្រចេះ សមត្ថកិច្ច មន្រ្ដីរាជការ ជំនាញ​រដ្ឋបាលព្រៃឈើ និងប្រជាពលរដ្ឋជិត៦០០នាក់។
​លោកគង់ គឹមនី អភិបាលនៃគណៈអភិបាលស្រុកស្នួល បានឡើងអានរបាយការណ៍ស្ដីអំពីការ​អភិវឌ្ឍក្នុងមូលដ្ឋាន បញ្ហាការពារសន្តិសុខសណ្ដាប់ធ្នាប់ សុវត្ថិភាពជូនប្រជាពលរដ្ឋ និងការបង្កបង្កើន​ផលរបស់ប្រជាកសិករក្នុងមូលដ្ឋាន។ ក្នុងនោះលោកអភិបាលស្រុក ក៏បានលើកឡើងអំពីវិធានការ ទប់ស្កាត់ចំពោះបទល្មើសក្នុងសង្គម ជាពិសេសក្នុងនាមជាគណៈបញ្ជាការឯកភាពស្រុក ក៏បានធ្វើការ​ណែនាំដល់ប្រជាពលរដ្ឋ ឲ្យចូលរួមការពារ អភិរក្សព្រៃឈើ និងជម្រុញឲ្យសមត្ថកិច្ចសហការជាមួយ​នឹងជំនាញរដ្ឋបាលព្រៃឈើ បង្រ្កាបការកាប់បំផ្លាញឈើល្មើសច្បាប់ជាដើម។
លោកទ្រី សុភ័ក្រ្ដ នាយខណ្ឌរដ្ឋបាលព្រៃឈើខេត្តក្រចេះ បាន​ឡើងអានពីរបាយការណ៍ចំពោះ​លទ្ធផលទប់ស្កាត់បទល្មើសព្រៃឈើ ការចូលរួមចំណែកនិងបំផុសប្រជាពលរដ្ឋការពារព្រៃឈើ សត្វ​ព្រៃ ក្នុងនោះលោកក៏បានលើកឡើងអំពីបុណ្យទិវារុក្ខា៩កក្កដា បានប្រារព្ធធ្វើជាលើកដំបូងនៅក្នុង​ឆ្នាំ១៩៩២ ហើយពិធីបុណ្យរុក្ខាទិវានេះ ក៏ត្រូវបានប្រារព្ធធ្វើជារៀងរាល់ឆ្នាំមកទល់នឹងបច្ចុប្បន្ន។
លោកទ្រី សុភ័ក្ត្រ បន្តថា ដើម្បីអនុវត្តតាមគោលការណ៍របស់ក្រសួងកសិកម្ម ក៏ដូចជារដ្ឋបាល​ព្រៃឈើ អង្គភាពរដ្ឋបាលព្រៃឈើខេត្តក្រចេះ បានដាំដើមឈើសរុបបានចំនួន១១៦.១៣១ដើម ក្នុងនោះ ស្ថិតនៅក្នុងចំណុច១-គោងាប់ខេត្តក្រចេះ ៤៣.៧៨៦ដើមលើផ្ទៃដី១៥.៧៣ហិកតា, ២ ប្រាសាទស្រុកក្រចេះ ២.១០០ដើម លើផ្ទៃដី ២០០ហិកតា,៣ រមណីយដ្ឋានភ្នំព្រះ ស្រុកឆ្លូង ២៦.០០០ ដើម លើផ្ទៃដី ១៥.៦០ហិកតា,៤ ភ្នំសំរោង ស្រុកព្រែកប្រសព្វ ១៧.០៧៣ដើម លើផ្ទៃដី ៩.០០ហិកតា, ៥ ភ្នំលោកស្រុកព្រែកប្រសព្វ ៤.២១៥ដើម លើផ្ទៃដី ៤.០០ហិកតា, ៦ ផ្លូវម៉ាហ្គេត ស្រុកព្រែកប្រសព្វ ៤.២០០ដើម លើផ្ទៃដី ៤.០០ហិកតា, ៧ ឃុំស្នួល ស្រុកស្នួល ៣.៦០០ដើម លើផ្ទៃដី ២.០០ហិកតា, ៨ ឃុំសំបុក ស្រុកចិត្របុរី( ២០១០) ៤.០៥០ដើម លើផ្ទៃដី២០០ហិកតា, ៩ ឃុំសំបុក ស្រុកចិត្របុរី (២០១១) ១.៤៨០ដើម លើផ្ទៃដី២.០០ហិកតា, ១០ ឃុំឃ្សឹម ស្រុកស្នួល (២០១២) ៣.៥០៧ដើម លើផ្ទៃដី២.០០ហិកតា, ១១ ឃុំឃ្សឹម ស្រុកស្នួល(សួនអាពាហ៍ពិពាហ៍) ២.៧០០ដើម លើផ្ទៃដី ២.០០ហិកតា, ១២ ឃុំ២ធ្នូ ស្រុកស្នួល(២០១៤) ១.៣២០ដើម លើផ្ទៃដី ២.០០ហិកតា, ១៣ ភូមិព្រែករនាម ឃុំឃ្សឹម ស្រុកស្នួល ២.១០០ដើម លើផ្ទៃដី២.០០ហិកតា និងបាន​ដាំនៅតាមវត្តអារាម តាមសាលារៀន និងតាមទីសាធារណៈមួយចំនួនទៀត។
លោកទ្រី សុភ័ក្រ្ដ បានបញ្ជាក់ថា សមិទ្ធិផលខាងលើនេះបានមកដោយសារការខិតខំប្រឹងប្រែង ចូលរួមទាំងកម្លាំងកាយចិត្ត របស់បងប្អូនប្រជាពលរដ្ឋ លោកគ្រូអ្នកគ្រូ សិស្សានុសិស្ស កងកម្លាំងប្រ​ដាប់អាវុធ និងដោយមានការយកចិត្តទុកដាក់ ឧបត្ថម្ភគាំទ្រពីអាជ្ញាធរ រដ្ឋអំណាចគ្រប់ថ្នាក់៕ សុខ ខេមរា

20150713-191807.jpg

20150713-191756.jpg

20150713-191822.jpg


ចែករំលែក៖
ពាណិជ្ជកម្ម៖ Naza Wedding Planner ads2 ads3 ambel-meas ads5 ads6 scanpeople ads7 fk Print