រុស្ស៊ីបានឡើងគម្រោងចាក់ថ្នាំបង្ការឆ្លងកូវីដ-១៩ ដល់ពលរដ្ឋទាំងអស់ នៅខែតុលាក្រោយការសាកល្បងជោគជ័យ។
សារព័ត៌មាន Interfax បានដកស្រង់សម្តីរដ្ឋមន្ត្រីក្រសួងសុខាភិបាលរុស្ស៊ីលោក Mikhail Murashko បានឲ្យដឹងថា មជ្ឈមណ្ឌលស្រាវជ្រាវ Gamaleya នៅទីក្រុងមូស្គូ បាន បញ្ចប់ការសាកល្បងវ៉ាក់សាំងប្រឆាំងកូវីដ-១៩។
តាមការលើកឡើងរបស់រដ្ឋមន្ត្រីក្រសួងសុខាភិបាល ក្រុមគ្រូពេទ្យ និងសិស្សសាលាជាមនុស្សដំបូងគេដែលទទួលបានការចាក់វ៉ាក់សាំងមុនគេ។ លោកបន្តទៀតថា នៅខែតុលានឹងចាក់វ៉ាក់សាំងប្រឆាំងកូវីដ-១៩ ដល់ពលរដ្ឋរុស្ស៊ីទាំងអស់។
សារព័ត៌មានរ៉យទ័របានផ្សាយថា វ៉ាក់សាំងប្រឆាំងកូវីដ-១៩ដំបូងគេបង្អស់របស់រុស្ស៊ីនឹងត្រូវអនុម័តនៅថ្ងៃទី១០ខែសីហា ហើយនឹងផ្តល់ជូនក្រុមគ្រូពេទ្យក្រោយការអនុម័ត។ ប៉ុន្តែរុស្ស៊ីមិនបានប្រកាសពីរូបមន្តវិទ្យាសាស្ត្រ ពីលទ្ធផលនៃការសាកល្បងនោះទេ ធ្វើឲ្យក្រុមឯកទេសវេជ្ជសាស្ត្របារម្ភខ្លាចរងសម្ពាធនយោបាយដើម្បីផ្សព្វផ្សាយរូបភាពប្រទេសជាតិនៅលើឆាកអន្តរជាតិ។
ដើម្បីបញ្ចប់ក្តីបារម្ភពីសហគមន៍អន្តរជាតិ រុស្ស៊ីនឹងប្រកាសរូបមន្តវិទ្យាសាស្ត្រនៅពេលដ៏ខ្លីខាងមុខ។ រដ្ឋមន្ត្រីក្រសួងសុខាភិបាលរុស្ស៊ីបានបញ្ជាក់ថា «ក្រុមអ្នកវិទ្យាសាស្ត្ររុស្ស៊ីបានផ្តោតសំខាន់ទៅលើការផលិតវ៉ាក់សាំងឲ្យបានលឿនបំផុត មិនមែនចង់ក្លាយជាប្រទេស ទីមួយនៅលើពិភពលោកដែលមានវ៉ាក់សាំងនោះឡើយ។ គោលដៅរបស់រុស្ស៊ី គឺជួយដល់មនុស្សជាតិឆ្លងផុតពីជំងឺដ៏គ្រោះថ្នាក់នេះ៕
