ភ្នំពេញ៖ ជារឿងមួយចម្លែកដែរខណៈដែលឡំប្រឺតា២គ្រឿងសង្ស័យអ្នកបើកបរមិនគោរពច្បាប់ចរាចរណ៍បើកក្នុងល្បឿនលឿន បានបុកគ្នាពេញទំហឹង បណ្ដាលឲ្យម្ខាងក្រឡាប់ផ្ងារជើង តែគ្មានអ្នករងរបួស បង្កការភ្ញាក់ផ្អេីលដល់អ្នកដំណេីរកាលពីវេលាម៉ោង១០ និង៣០នាទីយប់ ថ្ងៃទី៩ ខែសីហា ឆ្នាំ២០២០ នៅតាមបណ្តោយផ្លូវម៉ៅសេទុង កែងនឹងផ្លូវលេខ១៨២ ស្ថិតក្នុងសង្កាត់វាលវង់ ខណ្ឌ៧មករា ។
តាមប្រភពព័ត៌មានពីកើតហេតុបានឱ្យដឹងថា មុនពេលកើតហេតុមានបុរសម្នាក់បានបើកឡំប្រឺតា ពណ៌ស ពាក់ស្លាកលេខភ្នំពេញ1HQ-4205 ធ្វេីដំណេីរក្នុងទិសដៅពីលិចទៅកើត ខណៈមកដល់កន្លែងកើតហេតុត្រង់ផ្លូវបំបែកជាបួនតាមទិសបញ្ជាសញ្ញាចរាចរណ៍ ភ្លាមនោះស្រាប់តែឡំប្រឺតាមួយគ្រឿងទៀត ពណ៌លឿង ពាក់ស្លាកលេខ កំពង់ចាម1S-3270បើកបរដោយបុរសម្នាក់ ធ្វេីដំណេីរក្នុងទិសដៅពីត្បូងទៅជេីង ក្នុងល្បឿនលឿនដោយបំពានភ្លើងសញ្ញាចរាចរណ៍ក៏ជ្រុលទៅបុកគ្នាពេញទំហឹង បណ្តាលឱ្យអ្នកបើកបរឡំប្រឺតាពណ៌សខ្ទាតចេញពីឡំប្រឺតារងរបួសស្រាល។ ចំណែកអ្នកបេីកឡំប្រឺតា ពណ៌លឿង ខ្ទាតអូសប្រមាណជាង៥ម៉ែត្របណ្តាលឱ្យឡំប្រឺតានោះក្រឡាប់ផ្ទប់ជាមួយនឹងបង្គោលភ្លើងផ្ងារជើងម្ខាង តែក៏សំណាងល្អម្យ៉ាងដែរដែលមិនបង្កគ្រោះដល់មនុស្ស។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុភ្លាមៗ ខណៈនោះភាគីអ្នកបើកបរឡំប្រឺតាពណ៌លឿងព្រមទទួលកំហុស និងព្រមសងថ្លៃខូចខាតទាំងអស់ដល់ភាគីអ្នកបើកឡំប្រឺតាពណ៌សដើម្បីបញ្ចប់រឿងនៅនឹងកន្លែង៕ ដោយ៖ ភារ៉ា ដង្កោ
