ខេត្តកណ្តាល៖ គ្រឿងចក្រប្រភេទជីកកកាយ ដី ឈូសដី និងរថយន្តសម្រាប់ដឹក ដីចេញពីការដ្ឋានត្រូវបាន សមត្ថកិច្ច ចម្រុះដឹកនាំដោយ លោកជឹម សុខុន អភិបាលរងខេត្ត កណ្តាល ចុះចាប់ស្ងាត់ៗមិនអោយអាជ្ញា ធរដែនដីដឹងនោះឡើយព្រោះខ្លាចក្រុមរកស៊ីជីកដីខុសច្បាប់ជន្លៀសគ្រឿងចក្រចេញពីរណ្តៅដី ។
ករណីចុះចាប់ គ្រឿងចក្រជីក ដី ខុសច្បាប់រួមនិងរថយន្តដឹកដីនេះបានធ្វើឡើងនៅវេលាម៉ោង១០ និង១០នាទីព្រឹកថ្ងៃទី៣ ខែកុម្ភៈ ឆ្នាំ២០១៦ ចុះពីផ្លូវជាតិលេខ១ចម្ងាយជាង២០០០ម៉ែត្រ ស្ថិតក្នុងភូមិជ្រោយដង ឃុំសំរោងធំ ស្រុកកៀនស្វាយ ខេត្តកណ្តាល ។
គ្រឿងចក្រដែលសមត្ងកិច្ច ចាប់ នៅពេល នេះរួមមានប្រភេទអេស្ការវ៉ាទ័រ២គ្រឿង អាប៊ុលសម្រាប់រុញដី១គ្រឿង និងរថយន្តសម្រាប់ដឹកដីចេញពីការដ្ឋានចំនួន៣គ្រឿង ។
លោក យ៉ង់ សំអូន នាយប៉ុស្តិ៍នគរបាលរដ្ឋបាលសំរោងធំដែលចូលរួមជាមួយគណៈកម្មាការបានអោយដឹងថា ការចុះហាមឃាត់គ្រឿង ចក្រជីកកកាយដីនេះដឹកនាំដោយលោកជឹម សុខុន អភិបាលរងខេត្តកណ្តាល ដោយសារតែការជីកដីនេះត្រូវបានក្រុមការងារថ្នាក់ខេត្តពិនិត្យឃើញថាគ្មានច្បាប់អនុញ្ញាតពីការិយាល័យជំនាញ ។ ចំពោះគ្រឿងចក្រនិងរថយន្តរក្សាទុកបណ្តោះអាសន្ននៅកន្លែងរណ្តៅដីរងចាំមានដំណោះស្រាយ ។
មន្ត្រីដែលបំរើការនៅសា លាឃុំសំរោងធំម្នាក់សុំមិនបញ្ចេញឈ្មោះបាន ប្រាប់ថាគ្រឿងចក្រនិងរថយន្តដឹកដីដែលកម្លាំងចម្រុះចុះទៅចាប់នៅពេលនេះ ជារបស់ឈ្មួញរកស៊ីជីកដី ដឹកដី ឈ្មោះបារាំង ។ កន្លងមកឈ្មួញឈ្មោះបារាំងនេះមានច្បាប់អនុញ្ញាតអោយជីកដី និងដឹកដីលក់ តែច្បាប់នោះហួសសុពលភាពហើយ ។ ដោយសំអាងលើច្បាប់ចាស់ដែលមានស្រាប់ឈ្មួញឈ្មោះបារាំងបានបន្តជីកដីទាំងបំពានច្បាប់ ហើយអាជ្ញាធរឃុំ-ស្រុក ក៍បានដឹងដែរពីសកម្ម ភាពជីកកកាយដីអត់ច្បាប់នេះ តែគ្មានវិធានការទប់ស្កាត់នោះទេ ពោលគឺឈ្មួញឈ្មោះ បារាំងនេះមានសែស្រឡាយនៅសាលាស្រុក ។
ពាក់ព័ន្ធករណីដែលលោក អភិបាលរងខេត្តដឹកនាំកម្លាំងចុះមកចាប់គ្រឿងចក្រជីកដីខុសច្បាប់ស្ងាត់ៗមិនអោយ អាជ្ញាធរស្រុកដឹងនេះដែរ លោកអ៊ូ ឈាង អភិបាលស្រុក កៀនស្វាយពុំអាចទំនាក់ទំនងបាននោះទេ ដោយទូរស័ព្ទ ចូលចំនួន២ដងតែមិនមានអ្នកទទួល ។
បន្ទាប់ពីអាជ្ញាធរខេត្តមាន ចំណាត់ការ បានធ្វើអោយប្រជាពលរដ្ឋ សាទរ ទន្ទឹមនិងនោះពួកគាត់ សំណូមពរដល់អាជ្ញាធរ មេត្តាពិនិត្យទីតាំងរណ្តៅដីដែលមានច្បាប់ផង ព្រោះទីតាំងខ្លះ អាងមានច្បាប់ធ្វើតាមតែទំនើងចិត្ត ដូចជា ការដឹកលើសកំណត់ បណ្តាលអោយជ្រុះធ្លាក់ មកលើផ្លូវ រអិល ហុយ ជាពិសេសបង្កគ្រោះថ្នាក់ចរាចរបណ្តាលអោយមនុស្ស ស្លាប់និងរបួសជារឿយៗ។ ជាមួយគ្នានេះដែរប្រជាពលរដ្ឋស្នើអោយមន្ត្រីជំនាញ ជាពិសេសលោកអភិបាលខេត្តបន្តចុះពិនិត្យរណ្តៅដីមួយកន្លែងទៀតនៅខាងក្រោយភូមិពពាលខែ ជីកជម្រៅរាប់សិប ម៉ែត្ររំខាងដល់ពួកប្រែតពុំមានសមត្ថកិច្ចណាចុះទៅហាមឃាត់នោះទេ គឺមានតែចាំរាប់ ក្បាលរថយន្តដឹកដីយកលុយតែប៉ុណ្ណោះ ក្រោមពាក្យថា “ គណៈកម្មាការទ្រទ្រុងផ្លូវ “ តែផ្លូវខូចអស់ហើយ ជាពិសេសផ្លូវក្នុងភូមិពពាលខែតែម្តង ប្រជាពលរដ្ឋធ្វើដំណើឆ្លងកាតម្តងៗស្រែករកតែ “ ពុទ្ធោ “៕
ដោយ៖ សណ្តោស
