ប្រធានាធិបតីលីបង់ លោកMichel Aoun បានប្រកាសថា សកម្មភាពស្រាវជ្រាវ ពីករណីផ្ទុះនៅកំពង់ផែទីក្រុងបេរ៉ូ នឹងត្រូវចំណាយពេលជាច្រើនទៀត។
លោ Michel Aoun បានបញ្ជាក់ថា រាល់មូលហេតុស្តីពីការផ្ទុះនៅកំពង់ផែ បេរ៉ូ ស្ថិតនៅក្នុងការស្រាវជ្រាវ ថាតើជាការធ្វេសប្រហែសរបស់ មន្ត្រីគ្រប់គ្រង ឬក៏មានការជ្រៀតជ្រែកពីខាងក្រៅ ។ ប្រធានាធិបតីMichel Aoun បានបញ្ជាក់ថា មិនមានការយឺតយ៉ាវក្នុងករណីស្រាវជ្រាវ ការផ្ទុះ សម្លាប់មនុស្ស១៧៧នាក់ និងរបួសជាង៦០០០នាក់។ ប្រធានាធិបតីបានបញ្ជាក់ទៀតថាដោយសារតែភាពស្មុគស្មាញដូច្នេះត្រូវការពេលវេលាជាច្រើនទៀត ដើម្បីស្រាវជ្រាវឲ្យបានច្បាស់។
ការស្រាវជ្រាវ ករណីផ្ទុះគីមី នៅកំពង់ផែ ក៏មានក្រុមអ្នកឯកទេសមកពីបរទេសចូលរួមផងដែរ ក្នុងនោះមានអ្នកជំនាញជនជាតិបារាំង និងក្រុម FBI របស់អាមេរិក។ រដ្ឋលេខាធិការក្រសួងការបរទេស អាមេរិក លោក David Hale បានបញ្ជាក់ថា ក្រុម FBI បានទៅកាន់ប្រទេសលីបង់ នៅចុងសប្តាហ៍នេះតាមសំណើររបស់រដ្ឋាភិបាល លីបង់ ដើម្បីធានាការស្រាវជ្រាវមានតម្លាភាព ។
សូមបញ្ជាក់ផងដែរថាការផ្ទុះនៅកំពង់ផែទីក្រុងបេរ៉ូកាលពីថ្ងៃទី៤ខែសីហា បានសម្លាប់មនុស្ស កើនឡើងដល់ទៅ១៧៧នាក់ និងរបួសជាង៦៥០០នាក់ បំផ្លាញមួយផ្នែកធំនៃទីក្រុង ។ ក្រោយការផ្ទុះនោះ ក៏មានបាតុកម្មជាច្រើនកើតឡើងប្រឆាំងនិងរដ្ឋាភិបាល ក្លាយទៅជាហិង្សា បណ្តលឲ្យមានអ្នករបួសជាច្រើនទៀត៕
