រុស្ស៊ីបានប្រកាសថា នឹងសហការជាមួយចិន ព្រមទាំងក្រុមហ៊ុនបច្ចេកវិទ្យាលំដាប់ពិភពលោក ហួវៃដើម្បីបង្កើតបណ្តាញសេវាអត់ខ្សែជំនាន់ទី៥ 5G ដែលរដ្ឋាភិបាលទីក្រុងមូស្គូខិតខំអភិវឌ្ឍន៍។
សារព័ត៌មានSputnik របស់រុស្ស៊ីបានដកស្រង់សម្តីរដ្ឋមន្ត្រីការបរទេស រុស្ស៊ី លោក Sergei Lavrov ដែលបានប្រកាសក្នុងវេទិកាអប់រំយុវជន”Territory of Meanings” ថា រុស្ស៊ីមិនអាចដើរតាមអាមេរិកឡើយ ដោយរុស្ស៊ីនឹងសហការជាមួយចិនក្នុងវិស័យ សេវាអត់ខ្សែ ជំនាន់ទី៥ 5G ។
ជាមួយគ្នានេះរដ្ឋមន្ត្រីការបរទេសរុស្ស៊ី លោកLavrov បានបញ្ជាក់ទៀតថា រុស្ស៊ីបានបង្កើនកិច្ចសហប្រតិបត្តិការជាមួយបណ្តាប្រទេសរួមគ្នាដើម្បីអភិវឌ្ឍទៅលើប្រព័ន្ធបច្ចេកវិទ្យាទំនើប ។
រដ្ឋមន្ត្រីការបរទេសរុស្ស៊ីបានបញ្ជាក់ថា «5G មានសារៈសំខាន់ចំពោះយើងទាំងអស់គ្នា ហើយរុស្ស៊ីនឹងមិននៅពីក្រោយការរីកចម្រើនក្នុងវិស័យបច្ចេកវិទ្យា ពិសេសគឺបច្ចេកវិទ្យា 5G »នោះឡើយ។
អាមេរិក បានដាក់ក្រុមហ៊ុនហួវៃ ក្នុងបញ្ជីខ្មៅ ដោយអាមេរិកបារម្ភថាក្រុមហ៊ុនចិនគំរាមកំហែងដល់សន្តិសុខជាតិអាមេរិក ។ កាលពីដើមខែសីហា ក្រសួងពាណិជ្ជកម្មអាមេរិកបានរឹតបន្តឹងថែមទៀតដល់ក្រុមហ៊ុនបច្ចេកវិទ្យា
ហួវៃ និងរារាំងបណ្តាក្រុមហ៊ុនចិន ចូលកៀកជាមួយបច្ចេកវិទ្យាអាមេរិក៕ ដោយ៖ធីរីណា
រូបភាព៖TTXVN
