វៀតណាម៖នៅវេលាម៉ោង១៨ ថ្ងៃទី៣០ ខែសីហា គណៈកម្មការប្រយុទ្ធប្រឆាំងជំងឺឆ្លងកូវីដ-១៩ បានប្រកាសឲ្យដឹងថា មកទល់ពេលនេះវៀតណាមមានអ្នកឆ្លងសរុបតែ១០៤០នាក់ដដែល។ ដូច្នេះក្នុងរយៈពេល២៤ម៉ោងកន្លងមកវៀតណាម មិនមានអ្នកឆ្លងម្នាក់ណាឡើយ គឺជាលើកដំបូងចាប់តាំងពីថ្ងៃទី២៥ខែកក្កដា មកទល់ពេលនេះ។
គិតមកដល់ម៉ោង១៨ ថ្ងៃទី៣០ខែសីហា វៀតណាមមានករណីឆ្លងកូវីដ-១៩ក្នុងប្រទេស ៦៩០នាក់ ភាគច្រើនអ្នកឆ្លងជាប់ពាក់ព័ន្ធនឹងទីក្រុងដាណាង ។ ដូច្នេះនៅក្នុងរយៈពេល២៤ម៉ោងគិតដល់វេលាម៉ោង ១៨ ថ្ងៃទី៣០ ខែសីហា វៀតណាមមិនមានអ្នកឆ្លងថ្មីម្នាក់ណាឡើយ។ ចំណែកអ្នកព្យាបាលជាសះស្បើយវិញមានដល់ទៅ១៩នាក់ក្នុងមួយថ្ងៃ។ ប៉ុន្តែអ្នកជាសះស្បើយត្រូវបន្តផ្តាច់ខ្លួន១៤ថ្ងៃទៀត ក្នុងតំបន់ដែលខ្លួនរស់នៅក្រោយចាកចេញពីមន្ទីរពេទ្យ។
ដូច្នេះអ្នកព្យាបាលជាសះស្បើយសរុប ដល់ទៅ ៦៩៥នាក់ក្នុងចំណោម១០៤០នាក់។ តាមរបាយការណ៍របស់គណៈកម្មការ ទប់ស្កាត់ជំងឺឆ្លងបានឲ្យដឹងថា បច្ចុប្បន្នអ្នកជំងឺធ្ងន់មាន១១នាក់
ហើយចំនួនអ្នកស្លាប់ដោយកូវីដ-១៩ នៅក្នុងប្រទេសវៀតណាមគឺ៣២នាក់ ភាគច្រើនជាមនុស្សចាស់មានជំងឺប្រចាំកាយ មិនអាចព្យាបាលជាសះស្បើយ ដូចជាជំងឺមហារីកដំណាក់កាលចុងក្រោយ និងជំងឺទឹកនោមផ្អែមជាដើម…៕ដោយ៖ធី រីណា
