ប្រទេសថៃ៖ លោក អ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃ តំណាងឱ្យលោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានចូលរួមពីធីចុះហត្ថលេខាកិច្ចព្រមព្រៀងលើគម្រោងព្រះរាជឧបត្ថម្ភក្នុងវិស័យអប់រំ ដែលជាព្រះរាជអំណោយដ៏ថ្លៃថ្លារបស់ព្រះអង្គម្ចាស់ក្សត្រិយ៍ មហាចក្រី សិរិនថន កាលថ្ងៃទី០១ ខែកញ្ញា ឆ្នាំ២០២០ កន្លងទៅ។ នេះបើយោងតាមសេចក្តីប្រកាសព័ត៌មាន របស់
ស្ថានទូតព្រះរាជាណាចក្រកម្ពុជា ប្រចាំព្រះរាជាណាចក្រថៃឡង់ដ៏។
ពីធីចុះហត្ថលេខាកិច្ចព្រមព្រៀងលើគម្រោងព្រះរាជឧបត្ថម្ភក្នុងវិស័យអប់រំ ដែលជាព្រះរាជអំណោយដ៏ថ្លៃថ្លារបស់ព្រះអង្គម្ចាស់ក្សត្រិយ៍ មហាចក្រី សិរិនថន ខាងស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំព្រះរាជាណាចក្រថៃ មានកិត្តិយសសូមជម្រាបជូនដំណឹង ដល់សាធារណជនមេត្តាជ្រាបថា ៖ បន្ទាប់ពីទទួលបានសិទ្ធិប្រទានពីសម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្ត្រីនៃព្រះរាជាណាចក្រកម្ពុជា លោក អ៊ុក សោភ័ណ ឯកអគ្គរាជទូតកម្ពុជា ប្រចាំប្រទេសថៃ តំណាងដ៏ខ្ពង់ខ្ពស់ លោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា តំណាងភាគីកម្ពុជា បានចូលរួមចុះ ហត្ថលេខាជាមួយលោក ដន ប្រាម៉ាត់វិណៃ ឧបនាយករដ្ឋមន្ត្រី រដ្ឋមន្ត្រីក្រសួងការបរទេស តំណាងភាគីថៃ បើកកិច្ច ព្រមព្រៀងគម្រោងព្រះរាជឧបត្ថម្ភដល់ព្រះរាជាណាចក្រកម្ពុជាលើវិស័យអប់រំ ស្តីពីការអភិវឌ្ឍវិទ្យាស្ថានបច្ចេកវិទ្យាកំពង់ឈើទាល នៅខេត្តកំពង់ធំ និងវិទ្យាស្ថានបច្ចេកវិទ្យាកំពង់ស្ពឺ នៅខេត្តកំពង់ស្ពឺ ដែលជាព្រះរាជអំណោយរបស់ព្រះអង្គ ម្ចាស់ក្សត្រីយ៍ មហាចក្រី សិរិនថន សម្រាប់រយៈពេល ៥ឆ្នាំបន្ថែមទៀត (ខែកញ្ញា ឆ្នាំ២០២០ ដល់ខែកញ្ញា ឆ្នាំ ២០២៥) នៅទីក្រុងបាងកក ។ វិទ្យាស្ថានទាំងពីរនេះ បើកបង្រៀនថ្នាក់បរិញ្ញាបត្ររង និងបរិញ្ញាបត្រលើជំនាញបច្ចេកវិទ្យាកសិកម្ម និងឧស្សាហកម្ម ក្នុងបេសកកម្មបណ្តុះបណ្តាលអ្នកជំនាញបច្ចេកទេស សម្រាប់ឆ្លើយតបទៅនឹងតម្រូវការ ការងារបច្ចុប្បន្ននៅក្នុងព្រះរាជាណាចក្រកម្ពុជា។ គម្រោងព្រះរាជឧបត្ថម្ភដល់ព្រះរាជាណាចក្រកម្ពុជាលើវិស័យអប់រំ បានកើតចេញពីការព្រះរាជតម្រិផ្តួចផ្តើម ដ៏ថ្លៃថ្លារបស់ព្រះអង្គម្ចាស់ក្សត្រីយ៍ ក្នុងព្រះបំណងចូលរួមអភិវឌ្ឍប្រព័ន្ធអប់រំប្រកបដោយគុណភាពសម្រាប់យុវជនកម្ពុជា ប្រៀបដូចជាអំណោយប្រកបដោយចីរភាព ដល់ប្រជាជនកម្ពុជា ដែលជាមិត្តនិងគ្នាជាយូរអង្វែងមកហើយ។
ការអនុវត្តគម្រោងព្រះរាជឧបត្ថម្ភកន្លងមក បានជម្រុញទំនាក់ទំនងរវាងព្រះរាជាណាចក្រកម្ពុជា និង ព្រះរាជាណាចក្រថៃឲ្យកាន់តែល្អប្រសើរ ជាពិសេស បង្កើតអោយមានកិច្ចសហប្រតិបត្តិការល្អ ទាំងផ្នែករដ្ឋ ឯកជន និង ប្រជាជន ព្រមទាំងបង្កើតឲ្យមានការអភិវឌ្ឍធនធានមនុស្សជំនាន់ថ្មី តាមរយៈការផ្តល់អាហាររូបករណ៍ដល់សិស្ស និស្សិត និងមន្ត្រីរាជការកម្ពុជាចំនួន ២,១២៤ កន្លែង ចាប់ពីឆ្នាំ២០០៥ ដល់ ឆ្នាំ២០២០ ដើម្បីជាការរួមចំណែក ក្នុងការអភិវឌ្ឍព្រះរាជាណាចក្រកម្ពុជា៕

ដោយ៖ សុខ ខេមរា