ខេត្តកោះកុង ៖ ប្រជាពលរដ្ឋនាំគ្នាភ្ញាក់ផ្អើលកាលពីថ្ងៃទី ១០ ខែ កញ្ញា ឆ្នាំ ២០២០ ខណ:ប្រទះឃើញសាកសពស្រ្តីម្នាក់ នៅសល់តែគ្រោងឆ្អឹង នៅចំណុចក្រោមដើមអាកាស្យា ស្ថិតនៅភូមិនាងកុក ឃុំប៉ាក់ខ្លង ស្រុកមណ្ឌលសីមា ។
ប្រភពព័ត៌មានពីកន្លែងកើតហេតុបានឲ្យដឹងថាក្រោយទទួលបានព័ត៌មាននេះភ្លាម កម្លាំងការិយាល័យជំនាញ សហការជាមួយកម្លាំងអធិការដ្ឋាននគរបាលស្រុកមណ្ឌលសីមា បានចុះទៅត្រួតពិនិត្យសព បានឲ្យដឹងថា សពរងគ្រោះមានឈ្មោះ ឈិត ស៊ីម ភេទស្រី អាយុ ៧៣ ឆ្នាំ (វង្វេងបាត់ការចងចាំ) ដែលបានបាត់ខ្លួនកាលពីថ្ងៃទី ១០ ខែ សីហា ឆ្នាំ ២០២០ បើតាមការបំភ្លឺ ពីកូនរបស់ជនរងគ្រោះ ដោយផ្អែកលើសម្លៀកបំពាក់និងសម្ភារ:ប្រើប្រាស់ នៅជាប់នឹងសាកសពជនរងគ្រោះ ដូចក្នុងថ្ងៃដែលបានបាត់ខ្លួននោះ ទើបសន្និដ្ឋានថា ជាជនរងគ្រោះស្លាប់ដោយខ្យល់គរប្រាកដមែន ។
ក្រោយមក គ្រោងឆ្អឹងសាកសពត្រូវបានសមត្ថកិច្ចប្រគល់ជូនសាច់ញាតិរៀបចំធ្វើបុណ្យតាមប្រពៃណី ៕
ដោយ÷ប្រាថ្នា
