ភ្នំពេញ៖ បើយោងតាមប្រភពពី Royal du Cambodge បានបញ្ជាក់ឱ្យដឹងថា៖ ខួបអនុស្សាវរីយ៍លើកទី ២៧ឆ្នាំ ព្រះរាជពិធីរាជាភិសេកគ្រងព្រះបរមសិរីរាជ្យសម្បត្តិគ្រាទី២ នៃព្រះករុណា ព្រះបាទសម្ដេចព្រះ នរោត្ដម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត និងទិវាប្រកាសឲ្យប្រើប្រាស់នូវរដ្ឋធម្មនុញ្ញ នៃព្រះរាជាណាចក្រកម្ពុជា។
សូមបញ្ជាក់ថា៖ កាលពី ២៧ឆ្នាំមុនពោលគឺនៅថ្ងៃទី២៤ ខែកញ្ញា ឆ្នាំ១៩៩៣ នៅព្រះរាជាណាចក្រកម្ពុជា មានមហាព្រត្តឹការណ៍ជាប្រវត្តិសាស្រ្តដ៏សំខាន់ចំនួន ២ធំៗបានកើតឡើងគឺព្រះរាជពិធីរាជាភិសេកគ្រងព្រះបរមសិរីរាជ្យសម្បត្តិគ្រាទី២ នៃព្រះករុណា ព្រះបាទសម្ដេចព្រះ នរោត្ដម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ដោយមានព្រះអង្គមានព្រះបរមនាមក្នុងព្រះបរមសិរីរាជ្យសម្បត្តិថា ”ព្រះករុណា ព្រះបាទសម្តេចព្រះ នរោត្តម សីហនុ រាជហរិវង្ស ឧភតោសុជាតិ វិសុទ្ធពង្ស អគ្គមហាបុរសរតន៍ និករោត្ដម ធម្មិកមហារាជាធិរាជ បរមនាថ បរមបពិត្រ ព្រះចៅក្រុងកម្ពុជាធិបតី” ជាទីគោរពសក្ការៈដ៏ខ្ពង់ខ្ពស់បំផុត និង ទិវាប្រកាសឲ្យប្រើប្រាស់នូវរដ្ឋធម្មនុញ្ញ នៃព្រះរាជាណាចក្រកម្ពុជា ឡាយព្រះរាជហស្តលេខាដោយ ព្រះករុណា ព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ក្នុងព្រះបរមឋានៈជា ព្រះប្រមុខរដ្ឋ នៃព្រះរាជាណាចក្រកម្ពុជា ។
សូមរម្លឹកពីថ្ងៃវិសេសវិសាលនេះ គឺ២៤ កញ្ញា ១៩៩៣ — ២៤ កញ្ញា ២០២០ សូមថ្វាយព្រះរាជកុសលថ្វាយ ព្រះវិញ្ញាណក្ខន្ធ ព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត សូមទ្រង់ស្តេចយាងបដិសន្ធិ ក្នុងព្រះបរមសុគតិភព កុំបីឃ្លៀងឃ្លាតឡើយ៕
ដោយ៖ សុខ ខេមរា
