ខេត្តកំពង់ចាម៖ នារសៀលថ្ងៃអាទិត្យ ទី២៧ ខែកញ្ញា ឆ្នាំ២០២០នេះ តាមប្រសាសន៍ណែនាំរបស់លោក ឌី វិជ្ជា និង លោកស្រី ហ៊ុន ម៉ាណា បានចាត់អោយលោក ជិន ប៊ុនធឿន ព្រមទាំងក្រុមការងារនាំយកអំណោយដ៏ថ្លៃថ្លាមួយ ចំនួនធំរបស់អ្នកឧកញ៉ា ព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី ទៅប្រគល់ជូនលោក ញឹម ម៉ន ជាបុរស ពោះម៉ាយរស់នៅភូមិត្រពាំងទូក ឃុំជ្រៃវៀន ស្រុកព្រៃឈរ ខេត្តកំពង់ចាម ។ លោកមានជម្ងឺទឹកនោមផ្អែមធ្ងន់ធ្ងរអស់រយៈពេល ៥ ឆ្នាំកន្លងមកហើយ ក្លាយជាជនពិការនៅនឹងកន្លែងមិនអាចប្រកបរបរចិញ្ចឹមគ្រួសារបានទេ។ សព្វថ្ងៃលោក ញឹម ម៉ន រស់នៅជាមួយឪពុកម្តាយចាស់ជរានិងកូន
ប្រុសតូចៗចំនួន៣នាក់ក្នុងបន្ទុក ។
អំណោយដែលបានផ្តល់ជូនរួមមមាន៖ ថវិកាចំនួន ៥០ម៉ឺនរៀល, គ្រឿងឧបភោគ-បរិភោគ និងសម្ភារប្រើប្រាស់ក្នុងផ្ទះបាយមួយឈុតធំ និងបានសម្រេចអោយសាងសង់ផ្ទះទេវតាជូន១ខ្នង ជាអំណោយអ្នកឧកញ៉ា ព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី ជំនួសផ្ទះចាស់ដែលមានសភាពទ្រុឌទ្រោម ធ្លុះធ្លាយជូនគ្រួសារលោកពូដើម្បីសម្រាលទុក្ខលំបាកមួយចំនួនធំ។
ក្នុងឱកាសនោះលោកមានអារម្មណ៍រំភើប ត្រេកអរឥត ឧបមា ហើយបានថ្លែងអំណរគុណដល់លោក ឌី វិជ្ជា និងលោកស្រី ហ៊ុន ម៉ាណា ទាំងទឹកមុខ ពោរពេញដោយក្តី សង្ឃឹមជាថ្មីរកអ្វីប្រៀបផ្ទឹមពុំបាន ដែលលោកទាំងពីរតែងតែគិតពីទុក្ខលំបាករបស់ប្រជាពលរដ្ឋគ្រប់ទីកន្លែង។សូមជូនពរលោក និងលោកស្រី ព្រមទាំងក្រុមគ្រួសារឱ្យមានសុខភាពល្អពេញបរិបូរណ៌៕
ដោយ៖ សិលា
