ខេត្តបន្ទាយមានជ័យ ៖ទឹកភ្លៀងបានធ្លាក់ខ្លាំងៗរយ:ពេលប៉ុន្មានថ្ងៃមកនេះ ធ្វើឲ្យមានជំនន់ទឹកភ្លៀងលិចលង់នៅស្រុកមួយចំនួនក្នុងខេត្តបន្ទាយមានជ័យ។
ដោយមានការលិចលង់ដោយជំនន់ទឹកភ្លៀងនិងដោយមានភាពចាំបាច់ និងមានការយកចិត្តទុកដាក់ខ្ពស់ពីលោក ឧត្តមសេនីយ៍ត្រី សិទ្ធិ ឡោះ ស្នងការនគរបាលខេត្តបន្ទាយមានជ័យ នៅរសៀលថ្ងៃទី៤ខែ តុលានេះ លោកបានបញ្ជាឲ្យអធិការដ្ឋាននគរបាលក្រុង/ស្រុកទាំង៩ និងមេបញ្ជាការវរសេនាតូចការពារព្រំដែនគោកទាំង៤ យកចិត្តទុកដាក់ខ្ពស់ក្នុងការចុះជួយបងប្អូនប្រជាពលរដ្ឋដែលជួបជំនន់ទឹកភ្លៀងលិចផ្ទះ សម្បែងនិងបានជម្លៀសបញ្ជូនបងប្អូនប្រជាពលរដ្ឋមកដាក់ទីទួលខ្ពស់ប្រកបដោយសុវត្ថិភាពដោយមិនឲ្យប្រជាពលរដ្ឋណាម្នាក់រងគ្រោះបាត់បង់ជីវិតដោយទឹកជំនន់ឡើយ។ក្រៅពីមានផលប៉ះពាល់ដល់ដំណាំ កម្លាំងសមត្ថកិច្ចបានរំដោះប្រជាពលរដ្ឋច្រើនគ្រួសារទៅកាន់ទីទួលសុវត្ថិភាពនិងរំដោះសត្វពាហន:ផងដែរ។
ជាមួយគ្នានេះដែរ លោក ឧត្តមសេនីយ៍ត្រី សិទ្ធិ ឡោះ បានសំណូមពរដល់ប្រជាពលរដ្ឋរងគ្រោះដោយទឹកជំនន់ សូមបងប្អូនយកចិត្តទុកដាក់ខ្ពស់ក្នុងការការពារជំងឺតម្កាត់ផ្សេងៗ ត្រូវរស់នៅស្អាត ផឹកទឹកស្អាត ជាពិសេសរួមគ្នាប្រឆាំងជំងឺកូវីដ-១៩ តាមការណែនាំរបស់ក្រសួងសុខាភិបាល ឲ្យបានគ្រប់ៗគ្នា៕
ដោយ៖ប្រាថ្នា
