មន្ត្រីប៉ូលិស៣រូបនៅក្នុងទីក្រុងបាងកកប្រទេសថៃ កាលពីថ្ងៃទី១៥ខែតុលាត្រូវបានផ្អាកការងារ ដោយសារតែមិនអាចបំពេញភារកិច្ចបានល្អ ទុកឲ្យក្បួនរថយន្តរបស់ព្រះមហាក្សត្រ ប្រឈមនិងក្រុមបាតុករ ។
គេហទំព័រKhaosod បានផ្សាយថាប៉ូលិស ដែលត្រូវផ្អាកការងារគឺ ស្នងការរង ប៉ូលិសទីក្រុងបាំងកក លោក Somprasong Yenthuam ទីពីរគឺលោកPrasai Jittasonthi មេបញ្ជាការក្រុមទីមួយ នៃស្នងការដ្ឋានក្រុងបាងកក់ និងទី៣គឺលោកManop Sukonthanapat មេបញ្ជាការសន្តិសុខ និងគ្រប់គ្រង ការប្រមូលផ្តុំគ្នា ។
នៅក្នុងសេចក្តីប្រកាស នៃស្នងការប៉ូលិសជាតិថៃ មិនបានបញ្ជាក់ពីមូលហេតុផ្អាកការងារ នោះឡើយ ។ ប្រភពព័ត៌មានបានឲ្យដឹងថា មន្ត្រីទទួលខុសត្រូវទាំង៣រូប មិនបានបំពេញភារកិច្ចបានល្អ ត្រូវទទួលទណ្ឌកម្ម គឺផ្អាកការងារ មួយរយៈ។ មន្ត្រីទាំងនោះមិនអាចបំបែកក្រុមបាតុករនៅតាមផ្លូវ Phitsanulok ពេលក្បួនរថយន្តព្រះមហាក្សត្រធឆ្លងកាត់ទីនោះ កាលពីថ្ងៃទី១៤ខែតុលា។
ក្បួនរថយន្តដឹកព្រះមហាក្សត្រនិងព្រះមហេសីSuthida ព្រមទាំងរាជបុត្រ Dipangkorn Rasmijoti ទៅកាន់ទីតាំងធ្វើពិធីសាសនានៅតំបន់ Wat Arun បានជួបជាមួយក្រុមបាតុក នៅតាមដងផ្លូវ Phitsanulok។ នៅពេលនោះ កម្លាំងប៉ូលិសបានឈរធ្វើជារនាំងដើម្បីឲ្យក្បួនរថយន្តព្រះមហាក្សត្រឆ្លងកាត់ ។
ហេតុការទាំងនោះបានធ្វើឲ្យ នាយករដ្ឋមន្ត្រីថៃ លោកប្រាយុទ្ធចាន់អូចារ្យ សម្រេចចេញបញ្ជាដាក់ទីក្រុងបាងកក់ក្នុងគ្រាអសន្ន ទប់ស្កាត់ ការជួបជុំគ្នាលើសពី៥នាក់ ។ ប៉ុន្តែក្រុមបាតុករនៅតែ បន្តធ្វើបាតុកម្ម មិនខ្វល់ពីច្បាប់ហាមប្រាមនោះឡើយ៕
