ខេត្តត្បូងឃ្មុំ៖ អំពើហិង្សាក្នុងគ្រួសារ ដោយសារតែជម្លោះពាក្យសម្តី បង្កជាទារុណកម្មខ្លោចផ្សាទៅលើជនរងគ្រោះ២នាក់ គឺជនបង្កដែលជាប្តី និងស្ត្រីជាម្តាយក្មេក នៅពេលដែលជម្លោះកើតឡើងរួចយកសាំងទៅដុតប៉ងសម្លាប់ខ្លួន ហើយគ្រានោះម្តាយក្មេកបានស្ទុះចូលទៅជួយបង្កឲ្យមានភាពភ្ញាក់ផ្អើលនៅវេលាម៉ោង២០និង៣០នាទី ថ្ងៃទី១២ ខែកុម្ភៈ ឆ្នាំ២០១៦ នៅចំណុចមុខផ្ទះឈ្មោះ យូ ផាត ស្ថិតនៅភូមិជីរោទិ៍ក្រោមទី១ ឃុំជីរោទិ៍ ស្រុក-ខេត្តត្បូងឃ្មុំ ។
ប្រភពព័ត៌មានពីឈ្មោះ យូ ផាត ភេទប្រុស អាយុ៥៨ឆ្នាំ រស់នៅភូមិ ឃុំ កើតហេតុខាងលើបានឲ្យដឹងថា មុនពេលកើតហេតុ ឈ្មោះ នេត សុផាន់ណា ភេទប្រុស អាយុ២៨ឆ្នាំ ដែលជាកូនរបស់គាត់បានឈ្លោះប្រកែកជាមួយភរិយាឈ្មោះ ផន ស្រីលីន អាយុ២៣ឆ្នាំ ។ ក្រោយពេលឈ្លោះប្រកែកគ្នាបានបន្តិច ឈ្មោះ នេត សុផាន់ណា បានទិញសាំងចំណុះ២លីត្រមកចាក់ដុតបំផ្លាញទ្រព្យសម្បត្តិ និងចាក់ដុតខ្លួនឯងនៅមុខផ្ទះ ។ ខណៈនោះឈ្មោះ ស្រូវ គឹមឆយ អាយុ៥១ឆ្នាំ ត្រូវជាម្តាយក្មេក ដែលជាភរិយាខ្លួន(យូ ផាត) បានស្ទុះទៅជួយឃាត់ ក៏ត្រូវភ្លើងឆេះរលាកទាំងពីរនាក់ ។
លោក យូ ផាត បានបន្តថា នៅថ្ងៃទី៣ ខែកុម្ភៈ ឈ្មោះនេត សុផាន់ណា បានឈ្លោះប្រកែកជាមួយប្រពន្ធម្តងរួចមកហើយ ក៏ព្រោះតែ ផាន់ណា ជាមនុស្សញៀនថ្នាំ ដើរផឹកស៊ីប៉ោឡែមិនគិតជួយធ្វើការផ្ទះសម្តែង ហើយចុះចេញពីផ្ទះបាត់យូរថ្ងៃមិនដឹងទៅណា ។
លុះដល់ថ្ងៃកើតហេតុ ឈ្មោះ ផាន់ណា បានត្រឡប់មកផ្ទះវិញ ក៏ឈ្លោះប្រកែកជាមួយប្រពន្ធ ហើយក៏ទិញសាំងមកដុតរបស់របរប្រើប្រាស់ និងសម្លៀកបំពាក់ចោល ហើយថែមទាំងដុតខ្លួនឯងទៀត ។
លោកអនុសេនីយ៍ត្រី ឡុង សារិន អធិការរងនគរបាលស្រុកត្បូងឃ្មុំបានឲ្យដឹងថា ក្រោយកើតហេតុ សមត្ថកិច្ច និងក្រុមគ្រួសារបាននាំជនរងគ្រោះទាំងពីរនាក់ ម្តាយក្មេក និងកូនប្រសារមកព្យាបាលនៅមន្ទីរពេទ្យខេត្តកំពង់ចាម ៕
ដោយ៖ ហេង សូរិយា
