កាលពីថ្ងៃទី២០ ខែតុលា ឆ្នាំ២០២០ អុីស្រាអែល និង អារ៉ាប់រួម (UAE) បានចុះកិច្ចព្រមព្រៀង៤ចំណុច ក្នុងនោះមានកិច្ចព្រមព្រៀង លើកលែងទិដ្ឋាការដល់ពលរដ្ឋប្រទេសទាំងពីរ។ នេះជាកិច្ចព្រមព្រៀងដំបូងបង្អស់ របស់ប្រទេសទាំងពីរ ក្រោយពេលបានសម្រេចចុះហត្ថលេខា ក្រោមអធិបតីភាពរបស់ប្រធានាធិបតីអាមេរិក នៅសេតវិមានកាលពីថ្ងៃទី១៥ ខែកញ្ញា ក្នុងការជំរុញទំនាក់ទំនងការទូតល្អប្រសើរនិងគ្នាឡើងវិញ។
តំណាងគណៈប្រតិភូអារ៉ាប់រួម និងអុីស្រាអែលបានចុះហត្ថលេខានៅទីក្រុងឌូបៃ ប្រទេសអារ៉ាប់រួម ។ កិច្ចព្រមព្រៀងលើកលែងទិដ្ឋាការ(វីសា) ដល់ពលរដ្ឋប្រទេសទាំងពីរគឺជាចំណុចចាប់ផ្តើមថ្មី ហើយពលរដ្ឋអារ៉ាប់រួមក្លាយជាពលរដ្ឋដំបូងគេបង្អស់ក្នុងសម្ព័ន្ធអារ៉ាប់ ទទួលបានការអនុញ្ញាតឲ្យចូលទឹកដីអុីស្រាអែល ដោយមិនចាំបាច់សុំវិសា។
នាយករដ្ឋមន្ត្រីអុីស្រាអែលលោក ណេតាន់ យ៉ាហ៊ូ បានបញ្ជាក់ថា ការសម្រេចផ្តល់សេរីភាពក្នុងការធ្វើដំណើរដល់ពលរដ្ឋប្រទេសទាំងពីរ នឹងនាំមកនូវផលប្រយោជន៍សេដ្ឋកិច្ចជាច្រើនរបស់ប្រទេសទាំងពីរ។ ចំណែកកិច្ចព្រមព្រៀង ៤ផ្សេងទៀត គឺក្នុងវិស័យអាកាសចរណ៍ វិនិយោគ បច្ចេកវិទ្យានិងវិទ្យាសាស្ត្រ។
ក្នុងថ្ងៃជាមួយគ្នានោះដែរ អុីស្រាអែល និង អារ៉ាប់រួមបានប្រកាសទទួលបានការព្រមព្រៀងទ្វេភាគី ដើម្បីការពារការវិនិយោគទៅវិញទៅមក។ រដ្ឋមន្ត្រីក្រសួងហិរញ្ញវត្ថុអារ៉ាប់រួម លោក Younis Haji Al-Khoury បានលើកឡើងថា ភាគឺទាំងពីរបានចុះកិច្ចព្រមព្រៀងស្តីពីការការពារវិនិយោគដែលមាន៩៩ចំណុច។ កិច្ចព្រមព្រៀងនោះនិងជួយដល់ប្រទេសទាំងពីររីកចម្រើនខ្ពស់ក្នុងវិស័យសេដ្ឋកិច្ច ៕
