ភ្នំពេញ៖កាលពីរសៀលថ្ងៃទី២៧ ខែតុលា ឆ្នាំ២០២០ កម្លាំងកងរាជអាវុធហត្ថរាជធានីភ្នំពេញសហការជាមួយនិងអាជ្ញាធរមូលដ្ឋានសង្កាត់ទឹកថ្លា ខណ្ឌសែនសុខ បានចុះមកពិនិត្យទីតាំងសណ្ឋាគារហ្គោលដិនផត ដែលមានទីតាំងស្ថិតនៅតាមបណ្តោយផ្លូវណតប្រ៊ីត ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ ក្រោយពីមានការចុះពិនិត្យទៅកាន់ទីតាំងនោះប្រមាណជាជិត២ម៉ោងសមត្ថកិច្ចពុំទាន់បានបញ្ជាក់លំអិតអំពីករណីអ្វីឲ្យពិតប្រាកដនៅឡើយទេ។ ជាមួយនិងអង្គភាព«នគរដ្រេហ្គន» មន្ត្រីអាវុធហត្ថបានបញ្ជាក់យ៉ាងខ្លីថា៖ នេះគ្រាន់តែជាករណីតាមដានស្រាវជ្រាវអង្កេតពាក់ព័ន្ធមុខសញ្ញាបទល្មើស ប៉ុន្តែនៅពេលដែលសមត្ថកិច្ចចម្រុះ ចុះមកដល់ទីតាំងភោជនីយដ្ឋាននៃសណ្ឋាគារនេះគឺជនសង្ស័យដែលសមត្ថកិច្ចធ្វើការតាមដាននោះបានចាកចេញមុនសមត្ថកិច្ចមកដល់ ទើបសមត្ថកិច្ចបន្តសហការជាមួយម្ចាស់ទីតាំងដើម្បីជួយផ្តល់ព័ត៌មានបន្ថែម និងធ្វើកំណត់ហេតុ ដើម្បីឈានដល់ការក្តោបមុខសញ្ញាបន្ថែមទៀត។
គេសង្ស័យថា ជនសង្ស័យដែលកម្លាំងកងរាជអាវុធហត្ថរាជធានីភ្នំពេញ តាមប្រម៉ាញ់នេះ អាចមកញាំអីនៅភោជនីយដ្ឋានខាងក្រោមសណ្ឋាគារនេះ រួចក៏បានចាកចេញ ទើបសមត្ថកិច្ចបន្តតាមដានតាមនីតិវិធី៕

ដោយ៖ និន សុភ័ស្ត