មកទល់ពេលនេះ ការបោះឆ្នោតនៅអាមេរិកមិនទាន់អាចកំណត់បានថាអ្នកណាឈ្នះឬចាញ់នៅឡើយទេ បើទោះបីទីតាំងបោះឆ្នោតមួយចំនួនបានបិទហើយក្តី ។ បេក្ខភាពទាំងពីររូប និងក្រុមការងារ បានតាមដានយ៉ាងយកចិត្តទុកដាក់បំផុតពីការរាប់សន្លឹកឆ្នោត ។ តាមគម្រោងនៅល្ងាចថ្ងៃទី ៤ ខែវិច្ឆិកា (ពេលវេលានៅកម្ពុជា)គេនឹងដឹងលទ្ធផលហើយ។
សារព័ត៌មាន CNN បានផ្សាយថា ក្នុងពេលបោះឆ្នោត ប្រធានាធិបតី ដូណាល់ ត្រាំ បាននិយាយថា «ឱកាសទទួលបានជ័យជម្នះរបស់ខ្ញុំគឺប្រាកដណាស់»។ ជាថ្មីម្តងទៀតលោកត្រាំជឿជាក់ថា លោកនឹងទទួលបានជ័យជម្នះ ដោយអាចទទួលបានសន្លឹកឆ្នោតតំណាង៣០៦សន្លឹក ប៉ុន្តែលោកបានសន្យាថា នឹងមិនប្រកាសពីជ័យជម្នះឆាប់ពេកនោះឡើយ។
ដោយសារតែការបោះឆ្នោតមុនពេលកំណត់ច្រើនដល់ជាង១០០លាននាក់ និងការបោះឆ្នោតតាមប្រៃសណីយ៍ ដូច្នេះលទ្ធផល
នឹងយឺតជាងការបោះឆ្នោតរាល់លើក។ ពេលនេះលោកត្រាំ និងគ្រួសារកំពុងតែទន្ទឹងរង់ចាំលទ្ធផលនៅក្នុងសេតវិមាន។
តាមច្បាប់បោះឆ្នោតអាមេរិក នៅថ្ងៃទី៨ ខែធ្នូ បណ្តារដ្ឋនឹងត្រូវដោះស្រាយពាក់ព័ន្ធនឹងការបោះឆ្នោតចប់សព្វគ្រប់ ហើយប្រកាសទទួលស្គាល់អ្នកទទួលបានជ័យជម្នះ។
នៅថ្ងៃទី១៤ខែធ្នូ សមាជិកតំណាងម្ចាស់ឆ្នោត(តំណាងរាស្ត្រ) នឹងបោះឆ្នោតជ្រើសរើសប្រធានាធិបតី ។ តាមប្រពៃណី បេក្ខភាពដែលទទួលបានជ័យជម្នះក្នុងរដ្ឋនីមួយៗគឺកៅអីតំណាងទាំងអស់បានទៅគណបក្សនោះ ដោយបែងចែងទៅតាមចំនួនពលរដ្ឋតិចឬច្រើន។
បេក្ខភាពរូបណាទទួលបានកៅអីតំណាងច្រើនក្នុងចំណោមកៅអី តំណាង៥៣៨កៅអី ស្មើនឹង២៧០កៅអីនឹងទទួលបានជ័យជម្នះជាប្រធានាធិបតីអាមេរិក។
នៅថ្ងៃទី៦ ខែមករា ឆ្នាំ២០២១ សភាអាមេរិកនឹងបើកកិច្ចប្រជុំដើម្បីពិនិត្យសន្លឹកឆ្នោតតំណាង ហើយប្រកាសអ្នកឈ្នះ។
នៅថ្ងៃទី២០ ខែមករា ឆ្នាំ២០២១ ប្រធានាធិបតីអាណត្តិទី៤៦នឹងស្បថចូលកាន់តំណែង ៕ដោយ៖ធី រីណា
