ប្រធានក្រុម កីឡាករ Harry Maguire បាននិយាយបន្ទាប់ពីក្រុមManchester United ចាញ់ក្រុម Arsenal ១-០ កាលពីថ្ងៃអាទិត្យថា ក្រុមManchester United ត្រូវតែធ្វើឱ្យទឹកដី Old Trafford ក្លាយជាទឹកដីក្នុងផ្ទះដ៏រឹងមាំម្តងទៀតប្រសិនបើពួកគេចង់ប្រជែងយកពានរង្វាន់នៅរដូវកាលនេះ។

បិសាចក្រហមបានបរាជ័យក្នុងការឈ្នះការប្រកួតក្របខ័ណ្ឌ Premier League នៅទឹកដី Old Trafford នៅរដូវកាលនេះដោយទទួលបានតែ១ពិន្ទុប៉ុណ្ណោះក្នុង៤ប្រកួតកន្លងទៅនៅរដូវកាលថ្មីនេះ។

កីឡាករ Harry Maguire បាននិយាយថា “ខ្ញុំមិនគិតថាវាជាការព្រួយបារម្ភមួយ ដែលធ្វើឲ្យខកចិត្ត ព្រោះយើងមិនបានឈ្នះការប្រកួតនៅផ្ទះទេ វាជាអ្វីដែលត្រូវផ្លាស់ប្តូរប្រសិនបើយើងនឹងទទួលជោគជ័យនៅឆ្នាំនេះ។ យើងត្រូវតែទទួលបានទម្រង់លេងដ៏ល្អធ្វើឱ្យប្រជាជនពិបាកមកទីនេះនិងទទួលបានជោគជ័យ”។

ខ្សែការពារសញ្ជាតិអង់គ្លេសវ័យ២៧ឆ្នាំរូបនេះបាននិយាយក្រោយពីក្រុមបរាជ័យពេលប្រកួតក្របខ័ណ្ឌ Premier League បន្ទាប់ពីក្រុមបិសាចក្រហមបានបំបាក់ក្រុម RB Leipzig ក្នុងលទ្ធផល ៥-០ ក្នុងការប្រកួតក្របខ័ណ្ឌ Champions League នៅទឹកដី Old Trafford ។

ក្រុមបិសាចក្រហមត្រូវធ្វើដំណើរទៅប្រទេសទួរគីដើម្បីប្រកួតជាមួយក្រុម Istanbul Basaksehir ក្នុងក្របខ័ណ្ឌ Champions League នៅថ្ងៃពុធនេះមុនពេលការប្រកួតក្របខ័ណ្ឌ Premier League ប៉ះនឹងក្រុមលេខ៣ Everton នៅថ្ងៃសៅរ៍ ៕ដោយ៖ភារៈ