ក្រុមម្ចាស់ផ្ទះស្តេចស Real Madrid បានយកឈ្នះក្រុមភ្ញៀវ Inter Milan ទាំងលំបាកក្នុងលទ្ធផល៣ទល់២ ក្នុងការប្រកួតវគ្គជម្រុះតាមពូល កាលពីយប់មិញ ដែលការឈ្នះនេះគឺជាលើកទី១ក្នុងវគ្គជម្រុះ Champions League រដូវកាលនេះ។

ការប្រកួតកាលពីយប់មិញ ការគ្រប់គ្រងបាល់របស់ក្រុមម្ចាស់ផ្ទះ Real Madrid បានច្រើនជាងក្រុមភ្ញៀវ ដោយនៅតង់ទី១ក្រុម Real Madrid មានឱកាសរកគ្រាប់បាល់នាំមុខ២គ្រាប់មុនក្រុម Inter Milan ដោយនៅនាទីទី១៣ ខ្សែប្រយុទ្ធសញ្ជាតិបារាំង Benzema រកបាន១គ្រាប់ និងនៅនាទីទី៣៣ ខ្សែការពារ Sergio Ramos រកបាន១គ្រាប់ទៀត។ ប៉ុន្តែនៅនាទីទី៣៥ ខ្សែប្រយុទ្ធ Martínez រកបាន១គ្រាប់សងវិញ រហូតដល់ចប់ការប្រកួតក្នុងតង់ទី១ ដែលធ្វើឲ្យក្រុមម្ចាស់ផ្ទះនាំមុខក្រុមភ្ញៀវ ២ទល់១។

ចូលដល់ការប្រកួតតង់ទី២ ក្រុមភ្ញៀវមានឱកាសច្រើនក្នុងការតាមស្មើ ប៉ុន្តែត្រូវខ្សែការពារក្រុមម្ចាស់ផ្ទះរារាំង រហូតដល់នាទីទី៦៨ ខ្សែប្រយុទ្ធ Perišić របស់ក្រុម Inter Milan រកបាន១គ្រាប់បន្ថែមទៀត ធ្វើឲ្យលទ្ធផលក្រុមទាំង២ស្មើគ្នា។ ក្រោយពីក្រុមភ្ញៀវរកបាន១គ្រាប់ស្មើហើយ ក្រុមម្ចាស់ផ្ទះ Real Madrid បានព្យាយាមដាក់សម្ពាធទៅលើក្រុម Inter Milan ដោយត្រូវការយកឈ្នះដើម្បីមានឱកាសទៅឡើងវគ្គបន្ត ហើយនៅនាទីទី៨០ ខ្សែប្រយុទ្ធស្លាប Rodrygo ដែលទើបប្តូរចូលក្នុងតង់ទី២ រកបាន១គ្រាប់ទៀត ធ្វើឲ្យ Real Madrid យកឈ្នះក្រុមភ្ញៀវ Inter Milan ៣ទល់២ទាំងលំបាក។

លទ្ធផលនេះធ្វើឲ្យក្រុម Real Madrid ទទួលបាន៤ពិន្ទុ ក្នុង៣ប្រកួតកន្លងទៅ ដោយចាញ់១ ស្មើ១ និងឈ្នះ១ ឡើងឈរលេខ៣ក្នុងពូលB ស្មើពិន្ទុជាមួយក្រុម Shakhtar Donetsk មាន៤ពិន្ទុដូចគ្នា។ ចំណែកក្រុម Inter Milan ឈរបាតតារាងមានតែ២ពិន្ទុប៉ុណ្ណោះក្នុង៣ប្រកួតកន្លងទៅ ហើយក្រុម Moncheng មកពីអាល្លឺម៉ង់បន្តឈរកំពូលតារាងមាន៥ពិន្ទុ ដោយ៣ប្រកួត ស្មើ២ និងឈ្នះ១។

សូមបញ្ជាក់ថា ការប្រកួតកាលពីយប់មិញក្រុមខ្លាំងៗបានយកឈ្នះគូប្រកួតបន្តឈរលេខ១ក្នុងពូលរៀងៗខ្លួន ដោយក្រុម Bayern Munich បានយកឈ្នះក្រុមម្ចាស់ផ្ទះ Salzburg ក្នុងលទ្ធផល៦ទល់២, ក្រុមម្ចាស់ផ្ទះមេឃខៀវ Man City បានយកឈ្នះក្រុម Olympiakos Piraeusលទ្ធផល៣ទល់០, ក្រុមហង្សក្រហម Liverpool បានយកឈ្នះក្រុម Atalanta លទ្ធផល៥ទល់០, ក្រុម Porto ឈ្នះក្រុម Marseille ៣ទល់០, ក្រុម Ajax ឈ្នះក្រុម Midtjylland លទ្ធផល២ទល់១ និងក្រុម AtleticoMadrid បានត្រឹមស្មើជាមួយក្រុមម្ចាស់ផ្ទះ Lokomotiv Moscowលទ្ធផល១ទល់១ ៕ដោយ៖ភារៈ