ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិ បានអំពាវនាវឱ្យអ្នកកាសែត ដែលចុះយកព័ត៌មាននាជំនួបរវាងលោក ប្រាក់ សុខុន រដ្ឋមន្ត្រីការបរទេសកម្ពុជា និងលោក Peter Szijjarto រដ្ឋមន្ត្រីការបរទេសហុងគ្រី កាលពីថ្ងៃទី៣ វិច្ឆិកា ទៅធ្វើតេស្តរកកូវីដ-១៩។ ការអំពាវនាវរបស់ក្រសួងនេះ ធ្វើឡើង នាយប់ថ្ងៃទី៤ វិច្ឆិកា ក្រោយពីរដ្ឋមន្ត្រីការបរទេសហុងគ្រី លោក Peter Szijjarto ត្រូវបានរាយការណ៍ថា មានផ្ទុកកូវីដ-១៩ នៅពេលទៅដល់ប្រទេសថៃ។
លោក កួយ កុង អ្នកនាំពាក្យក្រសួងការបទេស ក្រសួងការបរទេស បានឱ្យដឹងថា៖ ក្រសួងបានសម្របសម្រួលជាមួយក្រសួងសុខាភិបាល ដោយអនុញ្ញាតឱ្យអ្នកកាសែត ទៅធ្វើតេស្តសុខភាព នៅវិទ្យាស្ថានសុខភាពសាធារណៈ ដោយឥតគិតថ្លៃសេវាឡើយ។ លោកបានបន្ថែមថា ក្រោយធ្វើតេស្តហើយ អ្នកកាសែតទាំងអស់ ត្រូវអនុវត្តតាមការណែនាំរបស់មន្ត្រីក្រសួងសុខាភិបាល។
លោក កុយ កុង បានបញ្ជាក់ដូច្នេះថា៖«យើងសម្រួលឱ្យ(អ្នកកាសែត)បានទៅធ្វើតេស្ត ដើម្បីបញ្ជាក់យ៉ាងណានោះ គឺ(ក្រសួងសុខាភិបាល) គេមានគោលការណ៍របស់គេ។ ប៉ុន្តែយើងគ្រាន់តែជួយទាក់ទង(ក្រសួងសុខាភិបាល) ដើម្បីឱ្យពួកគាត់បានពិនិត្យសុខភាព»។
លោក Peter Szijjarto រដ្ឋមន្ត្រីការបរទេសហុងគ្រី ដែលទើបតែបញ្ចប់ដំណើរទស្សនកិច្ចនៅកម្ពុជានេះ ត្រូវបានរកឃើញថា មានផ្ទុកកូរ៉ូណាវីរុស ក្នុងអំឡុងពេលដាក់ចត្តាឡីស័កពេលទៅដល់ប្រទេសថៃ។ បញ្ហានេះ បានធ្វើឲ្យជំនួបរវាងលោករដ្ឋមន្ត្រីការបរទេសហុងគ្រី និងនាយករដ្ឋមន្ត្រីថៃ លោកប្រយុទ្ធ ចាន់អូចា ត្រូវលុបចោល។
ក្រោយទទួលបានព័ត៌មានថា ប្រមុខការទូតហុងគ្រីនេះ មានកូវីដ-១៩ នោះ រដ្ឋាភិបាលកម្ពុជាបានសម្រេចឲ្យថ្នាក់ដឹកនាំ និងមន្ត្រីទាំងអស់ដែលបានជួបប្រាស្រ័យផ្ទាល់ជាមួយប្រតិភូរដ្ឋមន្ត្រីការបរទេសហុងគ្រី លោក Peter Szijarto ធ្វើចត្តាឡីស័ក តាមការកំណត់របស់ក្រសួងសុខាភិបាល។ នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ។ ក្នុងនោះមានចំនួន ៦២៨នាក់បានទៅធ្វើតេស្តកូវីដ-១៩ លទ្ធផលអវិជ្ជមាន៕
ដោយ៖ សិលា
