សារព័ត៌មាន​Channel News Asiaនៅថ្ងៃទី​៨ ខែវិច្ឆិកា​បានផ្សាយថា កម្លាំងប៉ូលិសថៃ បានបាញ់ទឹក​បំបែកក្រុមបាតុករដែលប្រមូលផ្តុំគ្នា​នៅមុខការិយាល័យរបស់រាជវាំងនៅទីក្រុងបាងកក។
កន្លងមក ក្រុមបាតុករថៃបានដង្ហែក្បួនបាតុកម្មនៅវិមាន ប្រជាធិបតេយ្យ​ក្នុងទីក្រុងបាងកក​ ហើយបន្តដង្ហែក្បួនទៅកាន់ការិយាល័យ​រាជវាំងដើម្បីដាក់លិខិតថ្វាយព្រះមហាក្សត្រ Maha Vajiralongkorn ស្នើឲ្យកែទម្រង់របបរាជាធិបតេយ្យ​។
កម្លាំងប៉ូលិសប្រឆាំងបាតុកម្មបានសម្រេចបាញ់ទឹកបំបែកហ្វូងបាតុករដែលឆ្លងផុតបន្ទាត់ហាមឃាត់ ចូលទៅកាន់តំបន់ Sanam Luang ក្បែររាជវាំងថៃ ។
លោកPiya Tawichai ស្នងការរងកម្លាំងប៉ូលិសថៃ បានឲ្យដឹងថា រដ្ឋាភិបាលនៅថ្ងៃទី​៨ខែវិច្ឆិកា បានដាក់ពង្រាយកម្លាំងប៉ូលិស​ជាង​៩០០០នាក់ទៅកាន់វិមានសន្តិភាព និងរាជវាំង ដើម្បីការពារទប់ស្កាត់បាតុកម្មបង្កហិង្សា​។
ក្រោយការបាញ់ទឹកបំបែកហ្វូងបាតុករ កម្លាំងប៉ូលិសបានសំុទោស ពីសកម្មភាពខាងលើ​។ ការិយាល័យរាជវំាង​ថៃក៏បានទទួលយកលិខិតរបស់ក្រុមបាតុករ ដែលផ្ញើថ្វាយព្រះមហាក្សត្រ​ផងដែរ៕