ភ្នំពេញ៖ ដើម្បីការពារពីការចម្លងនូវវីរុសកូវីដ-១៩ និងជំងឺឆ្លងមួយចំនួន សូមបងប្អូនអ្នកសារព័ត៌មានទាំងអស់ត្រូវមានការប្រុងប្រយ័ត្នខ្ពស់ និងអនុវត្តវិធានការសុខាភិបាលឱ្យបានជាប់ជាប្រចាំ រាល់ពេលដែលបំពេញភារកិច្ច និងរាល់ពេលធ្វើដំណើរ ដោយ៖
១-ពាក់ម៉ាស់ជាប់ជានិច្ចរាល់ពេលយកព័ត៌មាន និងនៅគ្រប់ពេល។
២-ឧស្សាហ៍លាងដៃជាមួយអាល់កុល ឬទឹកជែលលាងដៃឱ្យបានញឹកញាប់ (ត្រូវដាក់តាមខ្លួននូវដបអាល់កុលឬទឺកជែលលាងដៃ)។
៣-រក្សាគម្លាតសុវត្ថិភាពបុគ្គលក្នុងចម្ងាយយ៉ាងតិចមួយម៉ៃត្រកន្លះឡើងទៅ រាល់ពេលទៅជិតបុគ្គលដែលត្រូវផ្តល់ព័ត៌មាន ឬពេលចូលទៅថតព្រឹត្តិការណ៍អ្វីមួយ។ កុំប្រជ្រៀតគ្នានៅក្នុងស្ថានភាពយកព័ត៌មានដែលចង្អៀតកកកុញ ទោះជានៅកន្លែងណាក៏ដោយ។
៤-ពេលយកព័ត៌មានរួច ត្រូវសម្អាតដៃ និងសម្ភារដែលបានប្រើរួចភ្លាមៗជាមួយអាល់កុល ឬទឹកសម្លាប់មេរោគ។
៥-ប្រុងប្រយ័ត្នការប្រើក្បាលមេក្រូ មុនពេលដាក់ក្បាលមេក្រូឱ្យបុគ្គលម្នាក់និយាយត្រូវសម្អាតជាមុនដោយប្រើអាល់កុល ឬទឹកសម្លាប់មេរោគ ពេលចប់ ត្រូវសម្អាតម្តងទៀត។ សូមចៀសវាងការទាញក្បាលមេក្រូដាក់ពីបុគ្គលម្នាក់ទៅបុគ្គលម្នាក់ ដើម្បីនិយាយព័ត៌មាន ដែលជួនកាលក៏មានការទាញយកមកនិយាយខ្លួនឯងផ្ទាល់ដែរ ដោយមិនបានជូតសម្អាតដោយប្រើអាល់កុល ឬទឹកសម្លាប់មេរោគ។
៦-ប្រសិនបើលោកអ្នកមានការក្អកកណ្តាស់ ត្រូវចេះអនុវត្តវិធានការការពារដោយខ្ទប់មាត់និងច្រមុះដោយម៉ាស់ កន្សែង ក្រមា ឬក្រដាសជូតមាត់រួចបោះចោលក្រដាសជូតមាត់ដែលបានប្រើហើយនោះ ក្នុងធុងសំរាមត្រឹមត្រូវ។
៧-បុគ្គលដែលមានបញ្ហាសុខភាពឬមិនសូវស្រួលខ្លួន ត្រូវសម្រាកនៅផ្ទះ (អាចធ្វើការពីផ្ទះបាន ប្រសិនបើនៅអាចធ្វើការបាន) មិនត្រូវចេញដើរទៅយកព័ត៌មាននោះឡើយ ហើយស្វែងរកការពិគ្រោះពិនិត្យព្យាបាលនៅមន្ទីរពេទ្យរដ្ឋដែលនៅជិតលោកអ្នក ឬហៅទៅលេខ ១១៥ ៕
ដោយ៖សូរិយា
