ក្នុងរយៈពេលមិនដល់មួយសប្តាហ៍ផង ចាប់តាំងពីប្រធានាធិ​តីប៉េរូលោក​Martin Vizcarra ត្រូវរដ្ឋសភាដកតំណែង ​ក៏បានតែងតាំងប្រធានាធិបតីបណ្តោះអាសន្នដឹកនាំប្រទេសជំនួស ។ ប៉ុន្តែមិនបានប៉ុន្មានថ្ងៃផង ប្រធានាធិបតីថ្មី​ក៏បានដាក់លិខិតលាលែងចេញពីតំណែងផងដែរ។
ប្រធានាធិបតីបណ្តោះអាសន្នប៉េរូ លោក​Manuel Merino អាយុ​៥៩ឆ្នាំ បានលាលែងចេញពីតំណែងនៅថ្ងៃទី១៥ ខែវិច្ឆិកា​ធ្វើឲ្យស្ថានភាពនយោបាយ​នៅក្នុងប្រទេសនេះកាន់តែវឹកវរ ខណៈមិនមានមេដឹកនាំ ។
ការសម្រេចលាលែងចេញពីតំណែងរបស់លោក Manuel Merino ក្រោយកាន់អំណាចបានតែ​៥ថ្ងៃប៉ុណ្ណោះ ។ ការលាលែងចេញពីតំណែងក្រោយពេលមានបាតុកម្មប្រឆាំងនឹងការដកតំណែង​ប្រធានាធិបតី​Martin Vizcarra ។ បាតុកម្មបណ្តាលឲ្យមានមនុស្ស​២នាក់ស្លាប់និង​រាប់រយនាក់រងរបួស​។
អតីតប្រធានាធិបតីប៉េរូ លោក​Martin Vizcarra អាយុ​៥៧ឆ្នាំ​​មិនអាចឆ្លងផុតការបោះឆ្នោតផ្តល់ទំនុកចិត្ត ក្នុងសភា​កាលពីថ្ងៃទី ៩ខែវិច្ឆិកា​ឆ្នាំ២០២០។ ពេលនោះសភាក៏បានសម្រេច​ដកតំណែងប្រធានាធិបតីតែម្តង។
កាលពីថ្ងៃទី​១៥ខែវិច្ឆិកា ប្រធានាធិបតីបណ្តោះអាសន្នលោក Merino បានបង្កើតរដ្ឋាភិបាលថ្មី ដែលមានរដ្ឋមន្ត្រី​១៨ រូប​​​បានស្បថចូលកាន់តំណែង​។ មុនពេលលោកលាលែងចេញពីតំណែង លោកក៏បានស្នើឲ្យរដ្ឋមន្ត្រីទាំងអស់បន្តការងាររបស់ខ្លួន​បញ្ចៀសផលប៉ះពាល់ដល់ប្រទេសជាតិ​៕