ខេត្តកំពង់ចាម ៖ យោងតាមកំណត់ហេតុ របស់សមត្ថកិច្ចឱ្យដឹងថា កាលពីថ្ងៃទី២២ ខែវិច្ឆិកា ឆ្នាំ២០២០កន្លងមកនេះ កម្លាំងសមត្ថកិច្ចបានចុះទៅបង្ក្រាបក្រុមអ្នកញៀនលេងល្បែងស៊ីសង (បញ្ជល់មាន់) តែអ្នកលេងបានរត់គេចខ្លូនបាត់អស់សល់តែសម្ភារដែលមិនអាចស្ពាយយកទៅបាននៅកន្លែងកេីតហេតុតែប៉ុណ្ណោះ ។
ការបង្ក្រាបធ្វេីនៅចំណុចខាងជើងទំនប់អូរជ្រៃខាងលិចភូមិបែកពាង ឃុំជាលា ស្រុកបាធាយ ខេត្តកំពង់ចាម ដឹកនាំដោយលោកវរសេនីយ៍ឯក សំ ណាល់ អធិការនគរបាលស្រុកបាធាយ សហការជាមួយកម្លាំងប៉ុស្តិ៍នគរបាលរដ្ឋបាលជាលា សំបូរ និងប៉ុស្តិ៍នគរបាលរដ្ឋបាលតាំងក្រាំង និងមានការសម្របសម្រួលពីលោក សុធា ពិសិដ្ឋ ព្រះរាជអាជ្ញារងអមសាលាដំបូងខេត្តកំពង់ចាម។
លោកវរសេនីយ៍ឯក សំ ណាល់ ឱ្យដឹងថា នៅថ្ងៃទី២២ ខែវិច្ឆិកា ឆ្នាំ២០២០ ក្រោយពីទទួលបានពត៌មានពីប្រជាពលរដ្ឋថា នៅចំណុចខាងជើងទំនប់អូរជ្រៃខាងលិចភូមិបែកពាង ឃុំជាលា ស្រុកបាធាយ ខេត្តកំពង់ចាម មានការលួចលេងល្បែងសុីសងខុសច្បាប់ (បញ្ជល់មាន់)ភ្នាល់ដាក់លុយមក លោកបាននាំកម្លាំងចុះបង្ក្រាបដល់ទីតាំងបើកល្បែងបញ្ជល់មាន់នោះភ្លាមៗ ប៉ុន្តែដោយសារទីតាំងនោះផ្លូវចូលមានការលំបាកធ្វើដំណើរពេលសមត្ថកិច្ចចុះទៅដល់ក្រុមពួកអ្នកលួចលេងល្បែងបញ្ជល់មាន់ទាំងនោះបានរត់គេចខ្លួនបាត់អស់ ដោយបន្សល់ទុកនូវវត្ថុតាងមួយចំនួនរួមមាន៖
– ម៉ូតូចំនួន១០គ្រឿង
– មាន់ជល់ចំនួន២ក្បាល
– ជញ្ជីងថ្លឹងមាន់ចំនួន១
– កន្រ្តកដាក់មាន់ចំនួន៦
ចំពោះវត្ថុតាងខាងលើយើងបានដកហូតយកមករក្សាទុកនៅអធិការដ្ឋាននគរបាលស្រុកបាធាយ ដេីម្បីធ្វេីការស្រាវជ្រាវបន្ដ ៕ ដោយ ៖ វណ្ណៈ
