ខេត្តព្រៃវែង៖ ពិតជាគួរឲ្យខ្លោចផ្សារ និងអាណិតអាសូរណាស់ ដែលក្មេងប្រុសពីរនាក់អាយុមិនដល់១០ឆ្នាំផង ត្រូវម្តាយ និង ឪពុកចុងរត់ចោលទៅរកស៊ីនៅខេត្តឆ្ងាយ ទុកឲ្យពួកគេគ្មានទីជម្រករស់នៅរងាដូចសត្វឥតមេ ដើរផ្ញើវាសនានឹងអ្នកស្រុក អ្នកភូមិ តាមរយៈសុំបាយកក បាយក្តាំងចម្អែតតែមួយក្រពះប៉ុណ្ណោះ ។
នេះជារឿងពិត ដែលកើតមាននៅ ភូមិបាប្រីយ ឃុំព្រែកចង្ក្រាន ស្រុកស៊ីធរកណ្តាល ខេត្តព្រៃវែង ហើយត្រូវបណ្តាញសង្គម ហ្វេសប៊ុកបង្ហោះព្រោងព្រាត ព្រោះតែចង់បានកម្លាំងមនុស្សធម៌ ជួយក្មេងអភ័ព្វពីរនាក់នេះរួចផុតពីភាពវេទនា បានទៅសិក្សារៀនសូត្រនឹងគេ គ្រាដែលម្តាយនិង ឪពុកចុង មិនដើរតួសំខាន់ជាអ្នកមានគុណចិញ្ចឹមបីបាច់កូនឲ្យដល់ទីបញ្ចប់ សុខចិត្តរត់ចោលកូនទៅរកក្តី សុខតែពីរនាក់។
លោកគ្រូ ណេង ជាគ្រូបង្រៀនចូលនិវត្តមានទីលំនៅភូមិ-ឃុំខាងលើបានប្រាប់នគរវត្តតាមទូរស័ព្ទថា ពិតជាមានរឿងដ៏អភ័ព្វបែបនេះកើតមាននៅភូមិលោកមែន ហើយបច្ចុប្បន្នក្មេងប្រុសទាំងពីរនាក់នេះ កំពុងស្នាក់នៅជាមួយលោកគ្រូបណ្តោះអាសន្ន គ្រាដែលលោកកំពុងជរានិងមានជីវភាពខ្វះខាតដែរនោះ។
លោកគ្រូណេង មានប្រសាសន៍ថា ក្មេងប្រុសពីរនាក់នេះ កូនបងមានឈ្មោះ សាន ឌី អាយុ ៩ឆ្នាំ និងកូនប្អូនឈ្មោះ សាន ប៊យ អាយុ ៦ឆ្នាំ ។ ពួកគេមានឪពុកឈ្មោះ ប៊ន អាយុ ៣៤ ឆ្នាំ តែបានស្លាប់ចោលជាង៤ឆ្នាំមកហើយ និងម្តាយឈ្មោះ គឹម ឈាន អាយុ ២៨ឆ្នាំ ជាកសិករ រកព្រឹកខ្វះល្ងាច រកល្ងាចខ្វះព្រឹក។ ក្រោយមកម្តាយរបស់គេបានយកប្តីមួយទៀត ឈ្មោះ លីន អាយុ ៣៣ឆ្នាំ ជាអ្នកទីទ័លក្រ និងរស់នៅក្នុងខ្ទមតូចមួយក្នុង ភូមិឃុំជាមួយគ្នា មានជីវភាពនៅតែយ៉ាប់ដដែល។
លោកគ្រូណេងបន្តថា ដោយសារតែភាពក្រីក្រ ឈ្មោះលីន បានសុំប្រពន្ធទៅធ្វើការជាកម្មករ សំណង់នៅក្រុងភ្នំពេញយូរថ្ងៃខែមកហើយមិនដែលឃើញមកផ្ទះទេ ហើយដោយសារបាត់ប្តីយូរ នាងគឹម ឈាន ជាម្តាយរបស់ក្មេងប្រុសទាំងពីរនេះក៏បានចាកចេញពីផ្ទះទៅភ្នំពេញស្វែងរកប្តីដោយមិនបានប្រាប់អ្នកណាមួយម៉ាត់។ មកដល់ពេលនេះឮដំណឹងថានាងនិងប្តីក្រោយបាននាំគ្នាទៅធ្វើកម្មករនៅខេត្តបាត់ដំបង ហើយអាចឆ្លងទៅស៊ីឈ្នួលនៅប្រទេសថៃផងក៏មិនដឹង ។ ការចាកចេញពីភូមិនេះមានរយៈពេលជាងកន្លះខែមកហើយ ដោយទុកកូនតូចទាំង ពីរនាក់ឲ្យរស់កណ្តោចកណ្តែងឥតមេបាជាមួយអ្នកស្រុក អ្នកភូមិ ដែលខ្លះគេអាណិតជួយឲ្យបាយទឹកមួយពេល និងខ្លះទៀតឲ្យកន្លែងដេកតាមសំយាបផ្ទះ មើលទៅពិបាកភ្នែកណាស់ ទើបលោកគ្រូយកមកនៅ ជាមួយបណ្តោះអាសន្នប៉ុណ្ណោះ ។
លោកគ្រូណេងត្អូញត្អែរថា ប្រសិនបើគាត់មិនទាន់ចូលនិវត្តមិនបញ្ហាទេ តែនេះគាត់ចាស់ កូនក៏ច្រើន ជីវភាពគ្រួសារកាន់តែខ្វះខាតថែមទៀត មិនអាចផ្ចុងផ្តើមពួកគេឲ្យបានសិក្សារៀនសូត្រឬផ្គត់ផ្គង់ដល់ទីបញ្ចប់បានឡើយ ដូច្នេះលោកគ្រូសូមអំពាវនាវដល់នាងជាម្តាយ និងឪពុកចុងក្មេងទាំងពីរវិលមកផ្តល់ភាពកក់ក្តៅឲ្យកូនឡើងវិញ ។ ជាពិសេស សូមអំពាវនាវដល់សប្បុរសជនដែលមានចិត្តមេត្តាករុណា មេត្តាជួយស្រោចស្រង់ក្មេងអភ័ព្វទាំងពីរនេះឲ្យមានរស្មីផង បើពុំដូច្នោះទេ ពួកគេពិតជាគ្មានកោះត្រើយនិងគ្មានអនាគតឡើយ ៕
ដោយ៖ ប្រាថ្នា