ភ្នំពេញ៖ បុរសម្នាក់បានស្លាប់ពេលបញ្ជូនទៅដល់មន្ទីរពេទ្យបន្ទាប់ពីជិះម៉ូតូលឿនមិនប្រយ័ត្នជ្រុលចង្កូតបុករថយន្តកុងតឺន័រដែលចតស្ងៀមចំពីក្រោយពេញទំហឹង កាលពីវេលាម៉ោង១១និង៣០នាទីយប់ ថ្ងៃទី៣០ខែវិច្ឆិកា ឆ្នាំ២០២០ នៅ តាមបណ្តោយមហាវិថីសហព័ន្ធរុស្ស៊ី ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យ។
ជនរងគ្រោះឈ្មោះអ៊ុច ប៉ាវ ភេទប្រុសអាយុ២៦ ឆ្នាំមុខរបរអ្នកគិតលុយនៅម៉ាត ស្នាក់នៅម្ដុំវត្តតាំងកសាង សង្កាត់កាកាបទី២ ខណ្ឌពោធិ៍សែនជ័យ មានស្រុកកំណើតនៅក្រុងតាខ្មៅខេត្តកណ្ដាល។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកេីតហេតុគេបានឃេីញរថយន្តកុងតឺន័រ កក្បាលពណ៌ សមួយគ្រឿងពាក់ស្លាកលេខភ្នំពេញ3E 6599 ចតស្ងៀមលេីចិញ្ចេីមផ្លូវក្នុងទិសដៅពីកេីតទៅលិច ដេីម្បីដាក់ថ្មទុកសម្រាប់រៀបឃឿនផ្លូវ។ លុះមកដល់វេលាកេីតហេតុខាងលើស្រាប់តែមានយុវជនម្នាក់ជិះម៉ូតូម៉ាកស៊ុយហ្ស៊ុយគីBatពណ៌ ខៀវលាយស ពាក់ស្លាកលេខកណ្តាល1AI 8404 ក្នុងទិសដៅពី កើតទៅលិច ក្នុងល្បឿនលឿនមិនប្រយ័ត្នក៏ជ្រុលបុករថយន្តពីក្រោយពេញទំហឹងបោកផ្ទប់និងរថយន្តរងរបួសធ្ងន់ធ្ងរ។
ប្រភពដដែលបានបន្តថា ភ្លាមនោះក៏ត្រូវបានរថយន្តសង្គ្រោះមកដឹកយកទៅមន្ទីរពេទ្យតែអកុសលដោយសារស្ថានភាពរបួសធ្ងន់ធ្ងរពេកជនរងគ្រោះក៏ស្លាប់ពេលបញ្ជូនទៅដល់មន្ទីរពេទ្យ។
ក្រោយកេីតហេតុសមត្ថកិច្ចមូលដ្ឋានបានចុះទៅដល់ចំណុចកេីតហេតុនិងទាក់ទងទៅជំនាញការិយាល័យចរាចរណ៍ផ្លូវគោករាជធានីភ្នំពេញធ្វេីការវាស់វែងយករថយន្តនិងម៉ូតូទៅរក្សាទុករង់ចាំដោះស្រាយតាមច្បាប់។ដោយឡែកសពត្រូវបានប្រគល់ជូនក្រុមគ្រួសារយកទៅធ្វេីបុណ្យតាមប្រពៃណី៕ដោយ÷ សុខាសែនជ័យ
