ដោយសារតែប្រាក់ចំណាយសម្រាប់ជួសជុលនាវាផ្ទុកយន្តហោះឡើងវិញត្រូវចំណាយចាប់ពី២,៥-៣,៥ពាន់លានដុល្លារ ហើយត្រូវជួសជុលដល់ទៅជាង៦០ ភាគរយទើបធ្វើឲ្យកម្លាំងទាហានជើងទឹកអាមេរិកសម្រេចបោះបង់ចោលនាវាផ្ទុកយន្តហោះUSS Bonhomme Richard តែម្តង។
កាលពីខែកក្កដា ឆ្នាំ២០២០ នាវាUSS Bonhomme Richard បានចតនៅកំពង់ផែ San Diego រដ្ឋCalifornia ដើម្បីជួសជុលបន្ថែមដែលអាចចុះចតយន្តហោះចម្បាំងF-35Bបាន ។ ប៉ុន្តែជាអកុសលនាវាខាងលើក៏បានឆាបឆេះ ក្លាយទៅជាគ្រោះអគ្គិភ័យដែលនាំឱ្យមានការខាតបង់ច្រើនបំផុតសម្រាប់ទាហានជើងទឹកអាមេរិក។
រដ្ឋលេខាធិការកងទ័ពជើងទឹកអាមេរិក លោកKenneth Braithwaite បានឲ្យដឹងថាក្រោយការវាយតម្លៃ យើងមិនអាចជួសជុលនាវាផ្ទុកយន្តហោះខាងលើ បានឡើយ។ ជាមួយគ្នានេះក៏មិនអាចកែប្រែទៅជានាវាពេទ្យបានដែរដោយសារត្រូវចំណាយប្រាក់ច្រើនជាងការផលិតថ្មីទៅទៀត។
ទាំងនោះហើយបានជាអាមេរិកសម្រេចបោះបង់ចោលតែម្តង ហើយការបោះបង់នោះក៏ត្រូវចំណាយប្រាក់ដល់ទៅ៣០លានដុល្លារផងដែរ សម្រាប់បំផ្លាញនាវាផ្ទុកយន្តហោះខាងលើ ហើយត្រូវចំណាយពេលពី៩-១២ខែទើបរួចរាល់៕ដោយ៖ធី រីណា
