បច្ចុប្បន្នក្រៅពីបិទព្រំដែនHaryana និង Punjab ពេលនេះ​កសិករឥណ្ឌាមកពីរដ្ឋផ្សេងៗទៀតដូចជាUttar Pradesh និង Madhya Pradesh ក៏បាននាំគ្នាធ្វើដំណើរសំដៅទៅកាន់រដ្ឋធានីញូវដេលីដែរដើម្បីធ្វើបាតុកម្មប្រឆាំងច្បាប់ស្តីពីកសិកម្មថ្មី ដែលធ្វើឲ្យប៉ះពាល់ដល់ផលប្រយោជន៍របស់កសិករ​។ ពលរដ្ឋឥណ្ឌារាប់សិបពាន់នាក់បាននាំគ្នាទៅកាន់រដ្ឋធានីញូវដេលី​ ក្នុងរយៈពេល១សប្តាហ៍កន្លងមក ហើយដើម្បីចូលរួមធ្វើមហាបាតុកម្ម​។ ការធ្វើដំណើរទៅកាន់រដ្ឋធានីយ៉ាងច្រើន​បែបនេះបានធ្វើឲ្យ​ផ្លូវថ្នល់ជាច្រើនត្រូវកកស្ទះ​ ហើយកម្លាំងប៉ូលិសក៏បានបិទច្រកចូលក្នុងរដ្ឋធានីផងដែរ។ ប៉ូលិសទីក្រុងញូវដេលី​កាលពីថ្ងៃទី ៣ខែធ្នូ​បានបិទផ្លូវតភ្ជាប់ពីរដ្ឋធានីទៅកាន់បណ្តារដ្ឋ​​​ ដើម្បីទប់ស្កាត់ កសិករសម្រុកមករដ្ឋធានីធ្វើឲ្យកកស្ទះ​ចរាចរណ៍​ និងប៉ះពាល់សន្តិសុខសណ្តាប់ធ្នាប់ក្នុងសង្គម។ កាលពីថ្ងៃទី​៣ខែធ្នូ តំណាងក្រុមបាតុករ និងបណ្តារដ្ឋមន្ត្រី​ អភិបាលរដ្ឋ​បានជួបពិភាក្សាគ្នា ប៉ុន្តែមិនទាន់មានលទ្ធផលនៅឡើយទេ ក្រោយកិច្ចពិភាក្សាគ្នារយៈពេលជាង​៧ម៉ោង​។ តំណាងកសិករ សង្ឃឹមថានឹងមានកិច្ចពិភាក្សាជាបន្តទៀតនៅថ្ងៃទី​៥ខែធ្នូ​ស្តីពី​ច្បាប់​កសិកម្មថ្មីរបស់ឥណ្ឌា ។ រដ្ឋមន្ត្រីក្រសួងកសិកម្មឥណ្ឌា លោកNarendra Singh Tomar បានអំពាវនាវដល់កសិករ​​ឈប់មកកាន់រដ្ឋធានីញូវដេលីធ្វើបាតុកម្ម ដែលអាចប៉ះពាល់ដល់ពលរដ្ឋ​នៅក្នុងរដ្ឋធានី​​៕